Ndryshimi i taksimit të karburanteve dhe automjeteve, i propozuar nga qeveria për vitin 2027, nuk do të ketë të njëjtin efekt financiar për të gjithë drejtuesit e mjeteve. Ata që përdorin më shpesh makinën mund të kursejnë nga ulja e çmimit të naftës dhe benzinës, ndërsa pronarët që përshkojnë pak kilometra rrezikojnë të paguajnë më shumë për shkak të rritjes së taksës vjetore.
Por sa kilometra duhet të bëjë një automjet gjatë vitit që kursimi nga karburanti të kompensojë detyrimin shtesë të taksës?
Skyweb.al ka bërë një përllogaritje duke marrë si referencë një automjet që konsumon mesatarisht 7–8 litra karburant për 100 kilometra dhe që, sipas skemës së re, do të paguante rreth 6,000 lekë më shumë taksë vjetore.
Aktualisht, në çmimin e naftës dhe benzinës përfshihet taksa e qarkullimit prej 27 lekësh për litër. Heqja e saj, së bashku me efektin e TVSH-së aktuale prej 20%, përfaqëson një ulje teorike të çmimit prej 32.4 lekësh për litër.
LLOGARITE KËTU SA TË SHKOJNË TAKSAT E MAKINËS
Nga ana tjetër, qeveria propozon rritjen e taksimit vjetor të automjeteve, duke zhvendosur një pjesë të barrës fiskale nga konsumi i karburantit te zotërimi i mjetit.
Për shembull, nëse një automjet paguan aktualisht 6,000 lekë taksë vjetore dhe nga janari 2027 do të paguante 12,000 lekë, pronari i tij duhet të kursejë të paktën 6,000 lekë nga karburanti për të mos dalë me humbje nga ndryshimet.
Sipas përllogaritjeve, kjo shumë kompensohet pas konsumimit të rreth 185 litrave karburant, që për një makinë me konsum mesatar 7–8 litra për 100 kilometra përkthehet në afërsisht 2,300–2,650 kilometra në vit.
Kjo do të thotë se një drejtues që përshkon rreth 200 kilometra në muaj mund të arrijë të kompensojë rritjen e taksës, në varësi të konsumit të automjetit.
Për drejtuesit që bëjnë vetëm 2,000 kilometra në vit, llogaria është më pak e favorshme. Kursimi nga karburanti do të ishte rreth 4,500–5,200 lekë, pra më i ulët se detyrimi shtesë prej 6,000 lekësh.
Situata ndryshon për ata që përdorin rregullisht automjetin.
Me 5,000 kilometra në vit, kursimi nga karburanti përllogaritet në 11,300–13,000 lekë, duke krijuar një përfitim neto prej rreth 5,300–7,000 lekësh pas zbritjes së taksës shtesë.
Për një drejtues që përshkon 10,000 kilometra në vit, kursimi teorik nga karburanti arrin në 22,700–25,900 lekë.
Pas kompensimit të rritjes së taksës vjetore, përfitimi neto llogaritet në rreth 16,700–19,900 lekë.
Këto shifra janë orientuese dhe mbështeten në supozimin se heqja e taksës së qarkullimit reflektohet plotësisht në çmimin e karburantit.
Një tjetër element që duhet marrë parasysh është rritja e propozuar e TVSH-së standarde nga 20% në 21%, e cila do të zbusë efektin e uljes së çmimit.
Nëse një litër naftë kushton aktualisht 180 lekë, ulja teorike pas të dy ndryshimeve fiskale do të ishte rreth 31.2 lekë, duke e zhvendosur kufirin e kompensimit në afërsisht 2,400–2,750 kilometra në vit.
Për rrjedhojë, përfitimi nga reforma do të varet jo vetëm nga taksa e re e automjetit, por edhe nga intensiteti i përdorimit të tij dhe konsumi i karburantit.
Qytetarët mund të përdorin kalkulatorin e përgatitur nga Skyweb.al për të krahasuar detyrimin aktual me taksën e propozuar për vitin 2027 dhe për të vlerësuar sa mund të kursejnë nga ndryshimet fiskale. /skyweb.al
