Qeveria ka miratuar një vendim të ri me qëllim zgjidhjen e problematikave të kahershme të pronësisë, duke vendosur një fond prej 1.2 miliardë lekësh për kompensimin financiar të pronarëve dhe për t’u dhënë të drejtën e pronësisë qytetarëve që kanë legalizuar banesat e tyre.
Sipas vendimit, 435 qytetarë që më parë janë pajisur me vendim legalizimi për banesat e tyre do të kenë mundësinë të blejnë parcelën ndërtimore, duke fituar pronësinë e plotë dhe të ligjshme mbi truallin dhe shtëpinë ku jetojnë. Ky hap synon të eliminojë pasiguritë ligjore dhe të vendosë qartësi në të drejtat e pronësisë.
Nga ana tjetër, vendimi parashikon edhe kompensimin financiar për 515 pasuri të paluajtshme që janë prekur nga ndërtimet pa leje. Këto prona, që përfshijnë një sipërfaqe mbi 112 mijë metra katrorë, do të përfitojnë kompensim për sipërfaqet e zëna, duke ofruar një zgjidhje përfundimtare për pronarët dhe duke mbyllur konflikte të gjata mbi të drejtën e pronësisë.
Zbatimi i vendimit do të kryhet në drejtoritë vendore të Agjencisë Shtetërore të Kadastrës në zonat: Tiranë Veri, Tiranë Jug, Durrës–Kavajë–Krujë, Tiranë Rurale 1 dhe 2, Elbasan, Zonas e Stimuluara, Shkodër, Korçë, Lezhë, Sarandë, Kamëz–Vorë, Pogradec, Lushnjë, Fier dhe Vlorë. /Skyweb.al
