Këshilli i Ministrave ka vendosur sot që faturat dhe marrëveshjet e fluturimeve të kryeministrit Edi Rama të mos jenë më publike.
Vendimi është miratuar me argumentin e mbrojtjes së të dhënave personale, por praktikisht kufizon transparencën mbi shpenzimet e udhëtimeve zyrtare të qeverisë.
Sipas vendimit të botuar në faqen zyrtare të Këshillit të Ministrave, Drejtoria e Shërbimeve Qeveritare (DSHQ) do të jetë institucioni që negocion kontrata kuadër me kompani ajrore, rrjete hoteliere dhe agjenci udhëtimi, duke nënshkruar kontrata konfidencialiteti për “ruajtjen e informacionit të detyrueshëm mes palëve”.
Në VKM theksohet se çdo institucion që përfiton nga këto shërbime do të detyrohet të nënshkruajë aktmarrëveshje bashkëpunimi dhe konfidencialiteti, me të njëjtin qëllim, fshehjen e detajeve të konsideruara të ndjeshme për publikun.
Në dokument përcaktohet gjithashtu se DSHQ-ja do të veprojë si “organ qendror blerës” për biletat e udhëtimit dhe akomodimin jashtë vendit për Kryeministrinë dhe ministritë, ndërsa për Kabinetin e Kryeministrit, Presidencën dhe Kuvendin këto shërbime do të ofrohen “në rast se kërkohen prej tyre”.
Shpenzimet do të mbulohen nga buxhetet përkatëse të institucioneve përfituese.
Institucionet duhet të dërgojnë kërkesat për bileta dhe akomodim në hoteleri jo më vonë se 15 ditë nga data e udhëtimit, ndërsa në raste emergjente mund të paraqiten deri në 5 ditë para nisjes. Vetëm me miratimin e titullarit të institucionit, DSHQ-ja mund të kryejë rezervime në afate më të shkurtra.
Vendimi i sotëm i Këshillit të Ministrave pritet të ngjallë debat për transparencën e shpenzimeve publike, pasi ndalon publikimin e informacionit mbi kostot e udhëtimeve dhe shërbimeve që lidhen me aktivitetet jashtë vendit të zyrtarëve më të lartë të shtetit. /skyweb.al
