Ngjarja El Nino që po zhvillohet mbi Oqeanin Paqësor ka të ngjarë të jetë më e fuqishmja e regjistruar në kujtesën e gjallë, ka paralajmëruar ekspertët e zyrës meteorologjike në Britani, Met Office.
Ky fenomen i fuqishëm natyror klimatik rrit temperaturat globale dhe mund të shtojë rrezikun e kushteve ekstreme të motit.
I kombinuar me efektet e ndryshimeve klimatike të shkaktuara nga njerëzit, Met Office paralajmëron se ka shumë gjasa që viti 2027 të jetë viti më i nxehtë i regjistruar ndonjëherë në botë.
Ka gjithnjë e më shumë prova se modelet e motit në mbarë botën tashmë po ndikohen, me reshje musonike nën mesataren në Indi dhe aktivitet të reduktuar të uraganeve në Oqeanin Atlantik.
El Niño mund ta vendosë Mbretërinë e Bashkuar në një rrezik më të madh për një vjeshtë të lagësht dhe me stuhi, ndërsa shenja të një periudhe shumë të paqëndrueshme kanë filluar të shfaqen në parashikimet afatgjata.
“Duhet ta themi qartë se kjo është një ngjarje e paprecedentë”, tha Prof. Adam Scaife, drejtues i parashikimeve afatgjata në Met Office.
“Nuk kam parë kurrë një sinjal El Niño kaq intensiv në parashikimet tona.”
Nuk ka prova të qarta se ndryshimet klimatike po i bëjnë ngjarjet El Niño më të shpeshta, por ndikimet e tyre në mot ka të ngjarë të jenë më ekstreme në një botë që po ngrohet.
Çfarë është El Nino?
El Niño është një fenomen natyror i motit që ndodh afërsisht çdo dy deri në shtatë vjet dhe zgjat rreth një vit.
Erërat tregtare, të cilat zakonisht fryjnë nga lindja drejt perëndimit përgjatë Oqeanit Paqësor, mund të dobësohen ose edhe të ndryshojnë drejtim, duke lejuar që ujërat e ngrohta të përhapen drejt lindjes.
Nxehtësia çlirohet nga oqeani në atmosferë, duke rritur temperaturat globale dhe duke ndryshuar modelet e reshjeve.
Shkencëtarët zakonisht deklarojnë se është shfaqur El Niño kur temperaturat e sipërfaqes së detit në një zonë kryesore të Paqësorit janë 0.5°C ose më shumë mbi mesataren afatgjatë.
Matjet aktuale tregojnë se temperaturat janë më shumë se 2°C mbi normalen.
Parashikimet më të fundit të Met Office sugjerojnë se kjo ngrohje mund të kalojë 3°C më vonë gjatë këtij viti, ndërsa El Niño i afrohet kulmit të tij.
Kjo do të ishte e paprecedentë në të dhënat që datojnë që nga viti 1950 dhe, sipas Met Office, ndoshta do të ishte ngjarja më e fuqishme që nga shekulli XIX.
Temperaturat shumë të larta në thellësi të oqeanit, rreth 8°C mbi normalen në një thellësi prej 100 metrash në disa zona mund ta përforcojnë ndjeshëm këtë El Niño. Ato veprojnë si një rezervuar me ujë të ngrohtë që siguron energji shtesë për forcimin e fenomenit.
“Kemi edhe shumë muaj përpara ndërsa kjo ngjarje vazhdon të zhvillohet dhe kjo është një nga arsyet pse kemi rritur besimin se do të jetë një ngjarje rekord”, tha Dr. Zeke Hausfather, shkencëtar i klimës në Berkeley Earth, një organizatë kërkimore amerikane.
/skyweb.al
