Aeroporti Ndërkombëtar i Tiranës ka regjistruar ditën më të ngarkuar në historinë e tij më 17 gusht 2026, me 60.291 pasagjerë dhe 326 lëvizje avionësh brenda 24 orëve.
Sipas të dhënave të publikuara nga TIA, gjatë kësaj dite në aeroport operuan 32 kompani ajrore, duke e lidhur Tiranën me 79 destinacione. Lëvizjet e avionëve përfshijnë ngritjet dhe uljet e kryera gjatë ditës.
Italia, Mbretëria e Bashkuar, Polonia, Turqia dhe Belgjika ishin vendet me numrin më të lartë të pasagjerëve që udhëtuan përmes Rinasit.
Rekordi është shënuar në kulmin e sezonit veror. Në njoftimin e tij, aeroporti e lidh këtë rezultat me rritjen e trafikut ajror dhe zgjerimin e lidhjeve të Shqipërisë me destinacionet ndërkombëtare.
