Pirja e kafesë, madje edhe e kafesë pa kafeinë, lidhet me një rrezik më të ulët për zhvillimin e cirrozës, kancerit të mëlçisë dhe vdekjes nga sëmundjet e mëlçisë, sipas një studimi të ri.
Gjetjet, të publikuara në revistën shkencore Clinical Gastroenterology and Hepatology, tregojnë se konsumimi i kafesë shoqërohet me një probabilitet më të ulët për zhvillimin e sëmundjeve të mëlçisë.
Studiuesit analizuan të dhënat e më shumë se 350 mijë pjesëmarrësve nga UK Biobank, të cilët në fillim të studimit nuk kishin cirrozë apo kancer të mëlçisë, dhe ndoqën gjendjen e tyre shëndetësore për 13 vjet.
Rezultatet treguan se personat që pinin pesë ose më shumë filxhanë kafe në ditë kishin 32 për qind më pak rrezik për të zhvilluar cirrozë, 47 për qind më pak gjasa për t’u prekur nga kanceri i mëlçisë dhe 42 për qind më pak rrezik për të humbur jetën si pasojë e sëmundjeve të mëlçisë.
Një studim i vitit 2023 vlerësoi se sëmundjet e mëlçisë shkaktojnë rreth dy milionë vdekje çdo vit, duke përbërë rreth 4 për qind të të gjitha vdekjeve në botë. Afërsisht dy të tretat e këtyre viktimave janë burra.
Sipas studimit, personat që konsumonin më shumë kafe kishin gjithashtu më pak yndyrë dhe hekur në mëlçi, si edhe nivele më të ulëta të fibrozës dhe inflamacionit. Analizat e gjakut treguan se ata kishin nivele më të larta të proteinave që lidhen me funksionimin e shëndetshëm të mëlçisë dhe nivele më të ulëta të atyre që lidhen me dëmtimin dhe inflamacionin.
“Rezultatet tona mbështesin konsumimin e moderuar të kafesë për njerëzit që e pëlqejnë dhe e tolerojnë mirë atë,” tha autori kryesor i studimit, Ju Dong Yang.
Megjithatë, ai theksoi se studimi nuk është i mjaftueshëm për t’u rekomanduar njerëzve të fillojnë të pinë kafe vetëm për të mbrojtur mëlçinë. Sipas tij, fakti që si kafja me kafeinë, ashtu edhe ajo pa kafeinë treguan përfitime të ngjashme, sugjeron se efektet mbrojtëse nuk lidhen vetëm me kafeinën.
Autorja e studimit, Shelly Lu, tha se kafeja ndikon në shëndetin e mëlçisë duke vepruar mbi proceset e inflamacionit dhe fibrozës, çka mund të ndihmojë kërkimet e ardhshme të përcaktojnë se cilët persona përfitojnë më shumë.
Lidhja më e fortë u vu re te personat që konsumonin rreth tre deri në katër filxhanë kafe në ditë, megjithëse edhe ata që pinin vetëm një ose dy filxhanë në ditë kishin një rrezik dukshëm më të ulët për sëmundje të mëlçisë.
Studiuesit theksuan se mënyra më e mirë për të parandaluar sëmundjet e mëlçisë mbetet mbajtja e një peshe të shëndetshme, kufizimi i konsumit të alkoolit, aktiviteti fizik i rregullt dhe kontrolli i sheqerit në gjak, tensionit arterial dhe kolesterolit.
Nga ana tjetër, konsumimi i tepërt i kafeinës mund të shkaktojë rritje të ritmit të zemrës, palpitacione, tension të lartë të gjakut, ankth dhe çrregullime të gjumit. Në përgjithësi, sasia që konsiderohet e sigurt për shumicën e të rriturve është deri në 400 miligramë kafeinë në ditë, ose rreth katër filxhanë kafe. /skyweb.al
