Rritja e inflacionit dhe paralajmërimet në rritje për mungesë të karburantit për avionët kanë shtuar pasigurinë te udhëtarët në prag të sezonit veror, duke ngritur pikëpyetje mbi zhvillimin normal të pushimeve.
Megjithatë, ekspertët e industrisë ajrore vlerësojnë se paniku nuk është i justifikuar.
Shqetësimi kryesor lidhet me zinxhirin e furnizimit të karburantit, i cili është vënë nën presion nga tensionet gjeopolitike dhe luhatjet e tregut global të energjisë.
Këto zhvillime kanë sjellë rritje të kostove për linjat ajrore, duke ndikuar drejtpërdrejt në çmimet e biletave dhe planifikimin operacional.
Megjithatë, industria e aviacionit nuk përballet aktualisht me një krizë të menjëhershme që do të çonte në anulime masive fluturimesh.
Linjat ajrore dhe aeroportet kanë plane rezervë për të përballuar mungesa të mundshme, ndërsa autoritetet europiane dhe ndërkombëtare janë duke monitoruar situatën për të shmangur ndërprerje serioze.
Ekspertët theksojnë se ndikimi më i mundshëm për pasagjerët do të jetë rritja e çmimeve dhe jo anulimi i udhëtimeve.
Po ashtu, mund të ketë ndryshime të kufizuara në oraret apo destinacionet më pak fitimprurëse, por jo një kolaps të përgjithshëm të sezonit veror.
Këshru, udhëtarëve u rekomandohet të planifikojnë paraprakisht, të ndjekin njoftimet zyrtare të kompanive ajrore dhe të shmangin reagimet e nxituara, pasi aktualisht nuk ka sinjale për një bllokim të gjerë të trafikut ajror gjatë verës./skyweb.al
