Policia e Shtetit ka ngritur alarmin për një skemë mashtrimi online, ku autorë ende të paidentifikuar kanë krijuar faqe interneti të rreme, të ngjashme me faqen zyrtare të institucionit, me qëllim përfitimin e paligjshëm financiar nga qytetarët.
Sipas njoftimit zyrtar, këto faqe shpërndahen përmes mesazheve SMS dhe adresave të maskuara emaili, duke u paraqitur si komunikime zyrtare për pagesën e gjobave të qarkullimit rrugor, kryesisht për tejkalim shpejtësie. Policia sqaron se këto mesazhe nuk janë dërguar nga institucionet shtetërore dhe përbëjnë një përpjekje të organizuar për mashtrim.
“Autorët kanë përdorur teknika të sofistikuara për të mashtruar qytetarët dhe për t’i orientuar drejt faqeve të rreme, ku u kërkohet vendosja e të dhënave bankare. Qëllimi është vjedhja e këtyre të dhënave dhe përvetësimi i fondeve nga llogaritë e tyre”, thekson Policia e Shtetit.
Autoritetet u bëjnë thirrje qytetarëve për kujdes maksimal, duke kërkuar që të mos klikojnë në linke të dyshimta të ardhura përmes SMS apo platformave të tjera dhe të mos vendosin asnjëherë të dhënat bankare në faqe të pa verifikuara. Gjithashtu, çdo gjobë duhet të verifikohet vetëm përmes kanaleve zyrtare, si portali e-Albania.
Policia këshillon që në rast se qytetarët kanë vendosur të dhënat e tyre bankare në faqe të dyshimta, të kontaktojnë menjëherë bankën për bllokimin e kartës ose llogarisë dhe të denoncojnë rastin pranë autoriteteve.
Ndërkohë, strukturat ligjzbatuese bëjnë të ditur se janë duke punuar për identifikimin dhe ndjekjen penale të autorëve të kësaj skeme mashtrimi.
