Këshilli i Ministrave ka miratuar dhënien e një bonusi vere për pensionistët, në masën 5 mijë lekë të reja.
Lajmi u njoftua fillimisht nga kryeministri Edi Rama përmes një postimi në rrjetet sociale, ku ai tha se Akti Normativ i qershorit mundëson një tjetër bonus për pensionistët.
Më pas, masa u shpjegua edhe nga ministrja Delina Ibrahimaj, në një komunikim me gazetarët pas mbledhjes së qeverisë.
Ibrahimaj tha se bonusi do të nisë të shpërndahet nga nesër, më 1 korrik, në qendrat e shpërndarjes së pensioneve.
Sipas saj, vendimi është marrë pas performancës pozitive të ekonomisë dhe të ardhurave shtesë të mbledhura nga institucionet gjatë pesë muajve të parë të vitit.
“Duke parë performancën e ekonomisë, 5-mujorin e parë të vitit, por dhe performancën e të ardhurave që janë mbledhur shtesë nga institucionet, ne vendosëm sot që të akordojmë një bonus për pensionistët. Ky do të jetë bonusi i verës me vlerë 5 mijë lekë”, tha Ibrahimaj.
Përfitues do të jenë të gjitha kategoritë e pensionistëve.
Ministrja bëri me dije se bonusi do të akordohet për 777,200 qytetarë.
Efekti financiar i kësaj mase është 3.7 miliardë lekë.
“Ne do të vazhdojmë të kemi një vëmendje të veçantë dhe të shtuar te të ardhurat e pensionistëve”, u shpreh Ibrahimaj. /skyweb.al
