Kryeministri Edi Rama ka reaguar pas miratimit në qeveri të Aktit Normativ të qershorit, duke e cilësuar atë si pasqyrë të rritjes së ekonomisë.
Përmes një postimi në rrjetet sociale, Rama tha se akti normativ mundëson një tjetër bonus për pensionistët.
Sipas tij, paketa parashikon gjithashtu rritje të mbështetjes për personat me aftësi të kufizuara, fëmijët me aftësi të veçanta, personat me autizëm dhe kujdestarët e tyre.
Kryeministri shtoi se në aktin normativ përfshihen edhe masa mbështetëse për teknologjinë, sipërmarrjen, shëndetësinë, bujqësinë, zhvillimin urban dhe rural.
Rama theksoi se pjesë e paketës është edhe financimi për mbrojtjen, të cilin e cilësoi si më të madhin në historinë e Forcave të Armatosura.
“Në ditët në vijim do të shpjegojmë çdonjërën nga masat”, shkroi Rama.
Ai tha se mbetet domethënëse kalimi tek bonusi i pensionistëve i të gjitha të ardhurave shtesë nga rritja e çmimit të naftës.
Sipas kryeministrit, akti normativ tregon se ekonomia shqiptare po rritet dhe se të ardhurat shtesë po përdoren për mbështetje sociale.
