Huamarrja nga burime joformale është në rritje të ndjeshme në Shqipëri. Gjithnjë e më shumë familje po kërkojnë ndihmë financiare nga të afërmit dhe miqtë, për të përballuar shpenzimet e jetesës apo për të bërë blerje më të mëdha, si banesat.
Sipas raportit më të fundit të Bankës së Shqipërisë, rreth 39 për qind e huamarrjeve në vend realizohen tashmë në formën e parasë në dorë, duke shënuar një rritje me 5 pikë përqindje në krahasim me gjashtëmujorin e kaluar. Kjo tregon se një pjesë e mirë e qytetarëve po e shmangin sistemin bankar, duke u mbështetur më shumë te rrethi i tyre shoqëror e familjar për të siguruar fonde.
Në të njëjtën kohë, huamarrja formale përmes bankave ka shënuar rënie me 3 pikë përqindje, ndërsa përdorimi i kartave të kreditit apo overdrafteve mbetet pothuajse i pandryshuar.
Ekspertët e tregut vlerësojnë se kjo zhvendosje drejt huamarrjes joformale lidhet me kushtet më të rrepta të kredidhënies, normat e larta të interesit dhe mungesën e kolateralit, që e bën të vështirë marrjen e kredisë në banka. Për shumë familje, marrëdhëniet personale po kthehen në burimin kryesor të mbështetjes financiare. /skyweb.al
