Çmimi i naftës ka arritur sot në 217 lekë për litër në një pjesë të pikave të karburantit, ndërsa qeveria ka miratuar një tarifë të re që mund të reflektohet në çmimin përfundimtar për qytetarët.
Vendimi vendos pagesën prej 6.5 eurosh pa TVSH për çdo 1 mijë litra karburant të shënjuar.
E përllogaritur me TVSH, kostoja arrin në rreth 0.75 lekë për çdo litër naftë ose benzinë të hedhur në treg.
Tarifa do të paguhet nga kompanitë që importojnë, prodhojnë, rafinojnë, magazinojnë, transportojnë, shpërndajnë ose tregtojnë karburante.
Megjithëse detyrimi u vendoset subjekteve, kjo kosto pritet të kalojë te konsumatorët përmes çmimit të shitjes në pikat e furnizimit.
Pagesa do t’i kalojë shoqërisë “ALBTrace CO”, e cila do të ketë monopolin e shërbimit të shënjimit të karburanteve.
Shoqëria zotërohet në masën 51% nga shteti shqiptar, ndërsa 49% e aksioneve janë në pronësi të kompanisë private “O&S Security and Solutions”.
Sistemi synon gjurmimin e karburanteve në të gjithë zinxhirin e furnizimit dhe luftimin e kontrabandës, evazionit dhe abuzimeve me cilësinë.
Mbikëqyrja do të kryhet nga Administrata Doganore përmes laboratorëve të lëvizshëm, analizave në terren dhe sistemeve elektronike të monitorimit.
Zbatimi i tarifës do të nisë pas një periudhe kalimtare gjashtëmujore nga hyrja në fuqi e vendimit.
Shërbimi i markimit të karburanteve ishte kryer nga një kompani private nga viti 2013 deri në vitin 2024, përpara se përgjegjësia t’i kalonte Drejtorisë së Përgjithshme të Doganave.
Me vendimin e ri, shërbimi rikthehet te një shoqëri publiko-private dhe financohet përmes një tarife të detyrueshme mbi çdo litër karburant.
Masa vjen në një moment kur çmimet e naftës në Shqipëri janë rritur ndjeshëm dhe sot arrijnë deri në 217 lekë për litër.
Tarifa e re, edhe pse më pak se një lek për litër, i shtohet kostove dhe taksave ekzistuese që përfshihen në çmimin e karburanteve.
