Largimi i Neritan Nallbatit nga drejtimi i Departamentit të Policisë Kriminale pritet të pasohet nga ndryshime të tjera në nivelet e larta të Policisë së Shtetit. Zyrtarisht, Nallbati është transferuar në Akademinë e Sigurisë, pasi i ka përfunduar mandati në krye të departamentit.
Në vend të tij është komanduar Arjan Muça. Lëvizje ka pasur edhe në Departamentin e Marrëdhënieve Ndërkombëtare, ku Pëllumb Seferi është transferuar në Akademinë e Sigurisë.
Drejtimi i këtij departamenti i është besuar përkohësisht Artan Bajraktarit. Megjithatë, burime bëjnë me dije se largimi i Nallbatit nuk duhet parë vetëm si një rotacion rutinë.
Ai mund të jetë lëvizja e parë në kuadër të largimit nga pozicionet drejtuese të zyrtarëve që po verifikohen në lidhje me dosjen e AKSHI-t. Në fokus janë edhe kontaktet e dyshuara të drejtuesve të policisë me Ergys Agasin, i shpallur në kërkim nga SPAK me akuza të rënda, siç është edhe ajo e grupit të strukturuar kriminal.
Po ashtu, priten edhe transferime të drejtuesve te dikastereve të ndryshme si, M.K; KK; G.N dhe V.B, lidhje të njohura të Nallbatit.
Mbetet për t’u parë nëse gjatë kësaj vale transferimesh do të preket Ervin Gjana, Drejtoreshë e Krimit Kibernetik në Policinë e Shtetit. Bashkëshorti i saj Renato Hrstic, është nën hetim si shoqërues i Ergys Agasit,ndërsa GJKKO ka urdhëruar sekuestrimin e pajisjeve elektronike.
Agasi, së bashku me Ermal Beqirin, dyshohet nga SPAK si një nga krerët e grupit kriminal që orientonte tenderët e AKSHI, duke paracaktuar fituesit dhe duke fryrë kostot me qëllim përfitimin.
Sipas dyshimeve të SPAK, paratë e përfituara më pas shpërndaheshin përmes skemave të ndryshme, mes të cilave edhe faturimet fiktive.
Në këtë sfond, fakti që bashkëshorti i një drejtueseje të rëndësishme të Policisë së Shtetit del si shoqërues i një prej personave më të kërkuar nga SPAK, duket se nuk përbën më lajm në Shqipëri.
Verifkimet po bëhen për veprime të jashtëligjshme të drejtorisë së drejtuar prej saj që në kuadër të mbrojtjes së figurës së Agasit nga ekspozimi mediatik para shpërthimit të skandalit AKSHI. /skyweb.al
