Territori i Shqipërisë është përfshirë që nga dita e djeshme nga një situatë e paqëndrueshme atmosferike, me reshje shiu që pritet të vijojnë edhe në ditët në vijim. Instituti i Gjeoshkencave (IGJEO), pranë Qendrës Kombëtare Operacionale të Emergjencave Civile, bën me dije se krahas shiut, në zonat malore do të shfaqen edhe reshje dëbore.
Sipas parashikimeve zyrtare, rreziku më i lartë lidhet me përmbytjet, veçanërisht në qarqet e Vlorës dhe Kukësit, ku reshjet pritet të jenë intensive dhe të vazhdueshme.
Gjatë pasdites së sotme dhe ditës së nesërme, reshjet me intensitet të lartë do të përqendrohen kryesisht në veri dhe në qendër të vendit. Në qarqet Shkodër dhe Kukës parashikohen vërshime të shpejta në lumenjtë e vegjël malorë, si edhe rrëshqitje dherash në zona të caktuara. Në mjediset urbane mund të shfaqen përmbytje të lokalizuara, në varësi të gjendjes së sistemeve të kanalizimeve.
IGJEO thekson se për periudhën 3–7 janar 2026 reshjet intensive do të shkaktojnë rritje të ndjeshme të prurjeve në lumenjtë kryesorë të vendit, përfshirë Drin-Bunën, Liqenin e Shkodrës, lumin Mat, Shkumbin dhe Vjosë, duke rritur ndjeshëm rrezikun e përmbytjeve.
Për ditën e nesërme, temperaturat do të luhaten nga 10 deri në 16 gradë Celsius në bregdet, nga 7 deri në 15 gradë në zonat e ulëta dhe nga 3 deri në 11 gradë në zonat malore.
Në veçanti, në qarkun e Vlorës, në lartësitë mbi 600 metra mbi nivelin e detit, priten reshje dëbore gjatë periudhës 2–5 janar 2026, me intensitet më të shtuar rreth datës 5 janar.
Si pasojë e kushteve të motit, IGJEO paralajmëron për rrezik të vërshimeve në zona urbane dhe rurale, probleme në rrjetet e kanalizimeve dhe përmbytje të përkohshme në zona të identifikuara si me risk.
Në Qarkun e Vlorës, strukturat e mbrojtjes civile kanë nisur zbatimin e masave parandaluese, të cilat përfshijnë njoftimin e bizneseve dhe blegtorëve në zonat e rrezikuara, kontrollin dhe pastrimin e kanaleve kulluese, vënien në gatishmëri të hidrovorëve, si edhe garantimin e funksionimit të pandërprerë të sistemeve të ujësjellësit dhe furnizimit me energji elektrike.
Autoritetet u bëjnë thirrje qytetarëve të shmangin zonat e rrezikuara dhe të ndjekin me kujdes njoftimet zyrtare, në mënyrë që të minimizohen pasojat nga kushtet e motit të keq.
