Sipas Institutit të Statistikave, eksportet e mallrave arritën në 27 miliardë lekë në shtator 2025, duke shënuar një ulje prej 10.7% krahasuar me të njëjtën periudhë të një viti më parë dhe një rritje prej 34.6% në krahasim me gushtin. Pas katër muajve me rritje të qëndrueshme, shtatori shënoi rikthimin e eksporteve në rënie.
Në të njëjtën periudhë, importet e mallrave u rritën në 75 miliardë lekë, me një rritje prej 5.6% krahasuar me shtatorin e vitit të kaluar dhe 11.8% më shumë se një muaj më parë. Si rezultat, deficiti tregtar arriti në 48 miliardë lekë, duke u zgjeruar me 17.8% në raport me shtatorin 2024 dhe me 1.9% ndaj gushtit 2025.
Në total, gjatë periudhës janar–shtator 2025, eksportet arritën vlerën 260 miliardë lekë, duke u ulur me 7.9% krahasuar me të njëjtën periudhë të një viti më parë, ndërsa importet arritën në 657 miliardë lekë, me një ulje të lehtë prej 1.3%. Deficiti tregtar për nëntëmujorin u zgjerua në 397 miliardë lekë, me një rritje vjetore prej 3.6%.
Rënia e eksporteve në shtator është ndikuar kryesisht nga grupet “Materiale ndërtimi dhe metale” me -8.4 pikë përqindje dhe “Minerale, lëndë djegëse, energji elektrike” me -2.4 p.p. Në drejtim pozitiv kanë ndikuar grupet “Tekstile dhe këpucë” me +1.4 p.p. dhe “Ushqime, pije dhe duhan” me +0.2 p.p.
Në anën tjetër, rritja e importeve është mbështetur nga “Minerale, lëndë djegëse, energji elektrike” (+2.0 p.p.) dhe “Ushqime, pije dhe duhan” (+1.5 p.p.), ndërsa grupi “Lëkurë dhe artikujt prej tyre” ka ndikuar negativisht me -0.1 p.p.
Në aspektin gjeografik, eksportet kanë rënë drejt Italisë dhe Spanjës, ndërsa janë rritur drejt Greqisë dhe Kosovës. Importet kanë shënuar rritje nga Kina, Italia dhe Greqia, ndërsa rënie nga Turqia dhe Gjermania.
Sipas INSTAT, shkëmbimet tregtare me vendet e Bashkimit Europian përbëjnë 57% të totalit të tregtisë, me 74.6% të eksporteve dhe 51.3% të importeve, ndërsa partnerët kryesorë mbeten Italia, Kina, Greqia dhe Turqia. /skyweb.al
