Turkish Airlines ka paralajmëruar se mund të anulojë marrëveshjen për 150 avionë Boeing 737 MAX, nëse negociatat me prodhuesin e motorëve CFM International nuk japin rezultat.
Kompania turke kishte shpallur marrëveshjen paraprake gjatë takimit të shtatorit mes Presidentit turk Recep Tayyip Erdoğan dhe Presidentit amerikan Donald Trump, por tashmë kontrata po rrezikohet për shkak të kostove të larta të motorëve.
“Nëse CFM ofron kushte të pranueshme, ne do të nënshkruajmë me Boeing. Në të kundërt, do të kalojmë tek Airbus, sepse atje kemi më shumë zgjedhje për motorë,”, deklaroi Ahmet Bolat, kryetari i bordit të Turkish Airlines, në një intervistë për Reuters.
CFM International është furnizuesi i vetëm i motorëve për 737 MAX. Ndërsa Airbus A320neo, që konsiderohet alternativa kryesore, i lejon linjave ajrore të zgjedhin mes motorëve CFM dhe Pratt & Whitney.
Porosia për 150 avionë është pjesë e strategjisë së zgjerimit të flotës së Turkish Airlines, që synon të arrijë në 800 aeroplanë deri në vitin 2033.
Edhe pse burime nga industria e aviacionit shprehen optimiste për arritjen e një marrëveshjeje, tensionet aktuale pasqyrojnë krizën globale të furnizimit me motorë dhe rritjen e kostove në të gjithë sektorin e prodhimit aeronautik. /skyweb.al
