ITA Airways po jep sinjale zgjerimi në një moment kur industria ajrore po përballet me tensione të forta gjeopolitike dhe rritje të kostove të karburantit. Kompania ka nënshkruar një marrëveshje të re me Volotea, e cila sipas drejtuesve të saj do t’i japë mundësi të shtojë 104 lidhje të reja dhe të forcojë më tej rrjetin e fluturimeve.
Lajmi është bërë publik nga CEO i kompanisë, Joerg Eberhart, në një intervistë për Il Messaggero, ku ai ka theksuar se marrëveshja me transportuesin spanjoll është rezultat i një pune të gjatë për të integruar më mirë rrjetet dhe për të shfrytëzuar komplementaritetin mes dy operatorëve.
Sipas tij, Volotea është shumë e fortë në aeroportet europiane të qyteteve më të vogla dhe kjo i jep ITA Airways mundësinë të çojë një fluks të rëndësishëm pasagjerësh në të gjithë botën.
Në një kohë kur shumë linja ajrore kanë paralajmëruar shkurtime routesh për shkak të pasigurive në Lindjen e Mesme dhe rritjes së çmimeve të karburantit, Eberhart ka mbajtur një ton të qetë. Ai ka deklaruar se ITA Airways nuk ka në plan të mbyllë linja, megjithëse nuk ka përjashtuar mundësinë e ndonjë riprogramimi apo përdorimit të itinerareve alternative, nëse tensionet do të vazhdojnë.
Sipas kreut të kompanisë, fluturimet drejt Azisë, përfshirë Tokio, Bangkok dhe Delhi, aktualisht janë plot. Po ashtu, ai ka dhënë një mesazh të fortë për çështjen e furnizimit me karburant, duke deklaruar se ITA Airways nuk ka probleme në këtë aspekt, pasi për nëntë muaj kompania është e mbuluar nga mekanizmi i hedging.
Deklarata e CEO-s vjen në një moment kur tregu i aviacionit po ndjek me shqetësim zhvillimet në rajonin e Gjirit dhe ndikimin e tyre të mundshëm mbi furnizimin me karburant dhe kostot operative të linjave ajrore. Në këtë sfond, ITA Airways po kërkon të projektojë siguri, vazhdimësi dhe ambicie për zgjerim. /skyweb.al
