Një operacion i zhvilluar nga SPAK ka çuar në goditjen e një tjetër aktiviteti të paligjshëm të call centerave në Tiranë, duke përfunduar me arrestimin e personit të dyshuar si organizator kryesor.
Aksioni u realizua nga agjentët e Byroja Kombëtare e Hetimit, në bashkëpunim me Policia e Shtetit dhe Agjencia e Mbikëqyrjes Policore, ku u ushtruan kontrolle në disa ambiente në kryeqytet.
Operacioni erdhi pas një hetimi disa mujor, i nxitur nga sinjalizime të ardhura nga autoritetet franceze.
Në fokus të goditjes ishte një call center që vepronte pranë gjimnazit Sami Frashëri, ku sipas të dhënave, aktiviteti i paligjshëm zhvillohej i kamufluar përmes kompanisë “IVISION.AL” shpk. Pronari i dyshuar, Gentian Pjetërgjokaj, është arrestuar nën akuzën e mashtrimit me pasoja të rënda.
Gjatë operacionit është ndaluar edhe një punonjës policie, August Berberi, me detyrë në Komisariatin nr. 1 në Tiranë. Atij i është sekuestruar telefoni dhe është ushtruar kontroll në banesë nga agjentët e BKH-së dhe AMP-së, në kuadër të hetimeve për përfshirje të mundshme në këtë aktivitet.
Ky zhvillim vjen vetëm pak ditë pas një tjetër operacioni të zhvilluar në kryeqytet, ku u goditën tre call centera dhe u vendosën masa sigurie për disa persona.
Shtatë prej tyre u lanë në “arrest me burg”, dy të tjerë në “detyrim paraqitje” dhe “ndalim jashtë vendit”, ndërsa pesë persona u arrestuan në flagrancë.
Sipas hetimeve, aktiviteti mashtrues kishte për qëllim mashtrimin e qytetarëve të vendeve të Bashkimit Europian përmes skemave të rreme të investimeve online, duke shkaktuar dëme që dyshohet se kalojnë vlerën e 50 milionë eurove. Hetimet për këtë skemë kanë nisur fillimisht në Austria dhe janë zhvilluar në bashkëpunim me autoritetet shqiptare.
Një tjetër ambient i përdorur për këtë aktivitet u zbulua në zonën e Bërzhitës, i regjistruar si biznes në fushën e turizmit mjekësor, çka dyshohet se shërbente si mbulesë për mashtrimet.
Operacioni i fundit konsiderohet si pjesë e një serie ndërhyrjesh të autoriteteve shqiptare kundër call centerave të përfshirë në mashtrime ndërkombëtare, një fenomen që prej kohësh është kthyer në shqetësim serioz për partnerët europianë. /skyweb.al
