Sektori i shërbimeve ka shënuar rritje të ndjeshme gjatë tremujorit të dytë 2025, si në shitje, punësim, ashtu edhe në paga, duke konfirmuar rolin e tij si një ndër shtyllat kryesore të ekonomisë shqiptare.
Të dhënat e INSTAT tregojnë se shitjet neto u rritën ndjeshëm në shumicën e aktiviteteve: hotelet kryesuan me një rritje prej 14,5%, pasuar nga pasuritë e paluajtshme me 11,1% dhe transporti, magazinimi e posta me 10,4%. Edhe bar-restorantet u zgjeruan me 9,1%, ndërsa aktivitetet e informacionit dhe komunikacionit u rritën me 8,4%.
Në aspektin e punësimit, rritja më e madhe u regjistrua në hotele me +8,7%, pasuar nga agjencitë e udhëtimit dhe transporti, me nga +3,7%. Punësimi u rrit gjithashtu në pasuritë e paluajtshme, shërbimet juridike, arkitekturë e inxhinieri, si dhe tregtinë. Vetëm aktiviteti i sigurimit dhe hetimit shënoi një rënie të lehtë prej 0,7%.
Në lidhje me pagat, sektori turistik doli fitues absolut: hotelet regjistruan rritjen më të fortë me +25,2%, pasuar nga pasuritë e paluajtshme me +18,4% dhe tregtia me +16,1%. Rritje të dyshifrore u vunë re edhe në agjencitë e udhëtimit (+12,5%), bar-restorante (+12,0%) dhe arkitekturë e inxhinieri (+11,8%). /skyweb.al
