Apple do të prezantojë modelin e saj më të fundit të iPhone më 9 shtator, i cili pritet gjerësisht të jetë një telefon i palosshëm me emrin “iPhone Ultra”.
Ky do të jetë për herë të parë që gjiganti i teknologjisë hyn në tregun e telefonave të palosshëm. Modeli i ri pritet të ketë dy ekrane: një ekran të brendshëm prej 19,8 cm, i cili hapet si një libër, dhe një ekran të jashtëm prej 13,5 cm, për përdorim më tradicional si smartphone.
Pajisja pritet të ketë gjithashtu katër kamera — dy në pjesën e pasme, një në pjesën e brendshme dhe një kamerë të përparme për selfie.
“IPhone Ultra” pritet të pajiset me procesorin më të fundit të Apple, A20 Pro, i cili parashikohet të jetë 18% më i shpejtë dhe të konsumojë 30% më pak energji se paraardhësi, A19 Pro. Ky procesor pritet të përdoret edhe në modelet e ardhshme të nivelit të lartë iPhone 18 Pro dhe Pro Max.
Gjithashtu, thuhet se iPhone Ultra mund të ketë cepë asimetrikë. Kjo dyshohet pas publikimit të imazheve të mbrojtëseve të ekranit, të cilat u shfaqën në internet në fillim të këtij viti dhe tregonin cepa me kënd të drejtë në anën e majtë dhe cepa të rrumbullakosur në anën e djathtë.
Aktualisht, Samsung dominon tregun e telefonave të palosshëm, ndërsa kompani si Huawei, Google dhe Motorola, ndër të tjera, ofrojnë disa alternativa.
Analistët presin që Apple të dominojë tregun shumë shpejt pas hyrjes së saj me iPhone Ultra deri në fund të vitit. Kompania është në një pozicion të favorshëm për ta bërë këtë, falë historisë së saj të gjatë në ofrimin e funksioneve për përdorim me disa dritare dhe ekrane të mëdha, përmes iPad-it dhe pajisjeve të tjera.
Sipas firmës së inteligjencës së tregut IDC, Apple pritet të shesë më shumë se 10 milionë njësi gjatë vitit të parë. Çmimi i modelit bazë pritet të jetë rreth 2.200–2.500 euro, ndërsa modelet me më shumë hapësirë ruajtëse mund të kushtojnë 2.600–3.000 euro.
Eventi do të jetë gjithashtu një moment i rëndësishëm për kompaninë, pasi do të jetë prezantimi i parë publik i CEO-së së ardhshëm, John Ternus, i cili pritet të drejtojë prezantimin.
Ish-zëvendëspresidenti i lartë i inxhinierisë së harduerit do të marrë zyrtarisht drejtimin e kompanisë nga CEO-ja aktual, Tim Cook, më 1 shtator.
Në event pritet të prezantohen gjithashtu Apple Watch Series 12, Apple Watch Ultra, iPad mini 8 dhe AirPods Pro, si dhe përditësime për Apple TV dhe HomePod mini. /skyweb.al
