nga Skyweb.al
Pasi kishte bërë vite në pushtet dhe, me sa duket, prej kohësh nuk paguante asnjë faturë, një ish-politikan i lartë mblodhi një grup gazetarësh në një hotel në qendër të Tiranës dhe kur po ngroheshin, nxorri nga xhepi një kartëmonedhë 500-lekëshe për të paguar të gjithë tavolinën! Personazhit i kishte ngecur ora shumë vite më parë.
Me gjasë një barcaletë e ngjashme do të tregohet më vonë edhe për ministren e Ekonomisë dhe Inovacionit, Delina Ibrahimaj, e cila po ashtu duket se e ka humbur kontaktin me realitetin sa i përket çmimeve në Republikën e Shqipërisë.
Qeveria ka planifikuar të japë 4 mijë kredi të buta për çiftet dhe profesionistët e rinj.
Dy mijë do të jenë me interes zero për apartamente deri në 60 mijë euro, ndërsa 2 mijë të tjera me interes fiks 3%. Krahas tyre premtohet subvencionim qiraje për 3 mijë familje.
E pyetur soy nga gazetarët se ku mund të blihet aktualosht një apartament me 60 mijë euro në Tiranë, Ibrahimaj u përgjigj: “Ka në periferi të Tiranës, janë apartamente të sipërfaqeve të vogla”.
Skyweb.al kontrolloi ofertat e javëve të fundit në zonat periferike të kryeqytetit.
Le të marrim një apartament minimalisht siç thotë ministrja, prej 55 m², ku një çift me një fëmijë ose pa fëmijë të mund të jetojë pa u ulur me turne në tavolinën e bukës.
Në Astir, ku çmimet nisin nga minimumi 1,550–1,650 euro/m², apartamenti kushton të paktën 85–91 mijë euro. Në Fresk dhe Kombinat kushton 82–88 mijë euro, ndërsa në Yzberisht arrin 88–91 mijë euro.
Te Uzina e Traktorëve, 55 m² kushtojnë rreth 69–74 mijë euro.
Me 60 mijë euro në Astir, Fresk ose Yzberisht mund të blihen vetëm rreth 36–40 m².
Ministrja mund të gjejë ndonjë ofertë në Kamëz apo në skajin më të lirë të Paskuqanit, por ta paraqesësh kufirin 60 mijë euro si zgjidhje për strehimin e çifteve të reja në Tiranë është minimumi shkëputje nga realiteti i tregut real.
Në vend të deklaratave të përgjithshme, Ibrahimaj duhet të tregojë konkretisht adresat, sipërfaqet dhe apartamentet që mund të blihen me këtë shumë sot, jo me çmimet e dhjetë viteve më parë.
Sepse është problem serioz kur vetë ministrja e Ekonomisë nuk e di sa kushton realisht një apartament në kryeqytet, ndërkohë që prej saj priten politika zhvillimi! /skyweb.al
