Ekonomia shqiptare premton mundësi të mira investimi në sektorë me rritje të qëndrueshme dhe kthim relativisht të shpejtë kapitali.
Ky është thelbi i një raporti të publikuar së fundi nga qendra ALTAX ku vlerësohet se sektorët më me shumë përfitim pritet të jenë: energjia diellore dhe shërbimet energjetike si implantet fotovoltaike dhe bateritë, pasuritë e paluajtshme funksionale si magazina logjistike, ambiente biznesi, turizmi cilësor në bujtina, agro-përpunimi dhe shërbimet profesionale digjitale.
Sipas vlerësimeve të raportit Shqipëria në vitin 2026 vazhdon të ofrojë potencial të lartë për investime, sidomos në kontekstin e procesit të integrimit evropian dhe mbështetjes së fondeve ndërkombëtare.
Megjithatë edhe pse ekonomia shqiptare është e karakterizuar nga një ritëm i qëndrueshëm rritjeje dhe zhvillimi i sektorëve strategjikë, gjithashtu ajo përballet me sfida strukturore që kërkojnë qasje të kujdesshme nga investitorët.
Si rreziqe potenciale për investitorët vlerësohen: Korrupsioni dhe mungesa e transparencës, veçanërisht në procesin e tenderimeve, problemet me të drejtat e pronësisë dhe menaxhimin e tokës, ineficienca administrative, e cila ngadalëson zbatimin e projekteve dhe procedurat ligjore si edhe rreziqet gjeopolitike dhe klimaterike, që kërkojnë planifikim të kujdesshëm për të minimizuar humbjet.
Në raport përmendet edhe fakti se Ligji për Investimet Strategjike është zgjatur deri në dhjetor 2026, duke ofruar lehtësira fiskale, por pa harruar se ai mund të krijojë pabarazi dhe rreziqe korrupsioni.
Në këtë kuptim mesazhi i ekspertëve për investitorët është: Fokusohuni tek bizneset që gjenerojnë fluks të rregullt parash, mbijetojnë pa subvencione dhe shmangni investimet e varura nga politika!/scan.tv
