Policia e Shtetit ka paralajmëruar qytetarët për një skemë mashtrimi online që po qarkullon përmes mesazheve në telefon dhe synon vjedhjen e të dhënave bankare dhe parave nga llogaritë e tyre.
Sipas Policisë, autorët e mashtrimit paraqiten në mënyrë të rreme si përfaqësues të bankave dhe u dërgojnë qytetarëve mesazhe ku u kërkohet të përditësojnë të dhënat bankare, të verifikojnë llogarinë apo të kryejnë veprime të tjera përmes një linku të përfshirë në mesazh.
Bëhet fjalë për skema të njohura si “phishing”, përmes të cilave mashtruesit synojnë të sigurojnë kredencialet e e-banking, kodet e verifikimit OTP, PIN-in apo të dhënat e kartave bankare. Informacionet e siguruara në këtë mënyrë mund të përdoren më pas për transaksione të paautorizuara dhe vjedhjen e parave.
Policia u kërkon qytetarëve të mos klikojnë në linke të dërguara përmes SMS-ve, WhatsApp-it apo aplikacioneve të tjera të komunikimit, veçanërisht kur ato vijnë nga numra të panjohur ose të dyshimtë.
Gjithashtu, qytetarët këshillohen të mos japin në asnjë rast fjalëkalime, kode OTP, PIN apo të dhëna të kartave bankare. Përpara hyrjes në shërbimet e bankave online duhet të kontrollohet me kujdes adresa e faqes dhe të përdoren vetëm kanalet zyrtare të institucionit bankar.
Policia thekson se bankat nuk kërkojnë të dhëna konfidenciale përmes linkeve të dyshimta dhe, në rast paqartësish, qytetarët duhet të kontaktojnë bankën vetëm përmes numrave dhe kanaleve të saj zyrtare.
Në rast se një qytetar ka klikuar tashmë në një link të dyshimtë ose ka dhënë të dhënat bankare, duhet të kontaktojë menjëherë bankën për bllokimin e kartës ose llogarisë dhe të ndryshojë fjalëkalimet e aksesit në shërbimet bankare.
Rasti duhet të raportohet gjithashtu pranë Policisë së Shtetit, Drejtorisë për Hetimin e Krimeve Kibernetike ose drejtorive vendore të policisë.
“Mos klikoni. Mos jepni të dhëna. Verifikoni gjithmonë përmes kanaleve zyrtare”, është apeli i Policisë për qytetarët.
