Administrata Amerikane për Ushqimin dhe Barnat (FDA) ka miratuar një agjent radioaktiv nga Lantheus Holdings për përdorim në skanimet e trurit, që ndihmon në vlerësimin e pacientëve për sëmundjen e Alzheimerit, njoftoi kompania, raporton Reuters.
Agjenti, i tregtuar me emrin Tauklarify, injektohet përpara një skanimi me tomografi me emetim pozitronesh (PET). Ai bën të dukshme në imazhet e trurit depozitat jonormale të proteinës tau, të lidhura me Alzheimerin, te të rriturit me dëmtime të funksioneve njohëse që po vlerësohen për këtë sëmundje.
Një skanim pozitiv nuk konfirmon domosdoshmërisht praninë e patologjisë së proteinës tau, ndërsa një skanim negativ nuk e përjashton atë, tha kompania.
Miratimi u mbështet nga dy studime, në të cilat vlerësues të pavarur analizuan skanimet PET me Tauklarify të më shumë se 500 pjesëmarrësve dhe i klasifikuan ato si pozitive ose negative për patologjinë tau.
Më shumë se 7 milionë njerëz në SHBA vuajnë nga Alzheimeri, ndërsa numri i personave 65 vjeç e lart me këtë sëmundje mund të kalojë 13 milionë deri në vitin 2050, sipas Lantheus.
Tregu i imazherisë së proteinës tau dominohet aktualisht nga Tauvid, i kompanisë Eli Lilly, i cili u miratua në vitin 2020. Sipas analistit Yuan Zhi të B. Riley Securities, ky treg ka të ngjarë të ketë një vlerë prej më pak se 100 milionë dollarësh në vit. Zhi parashikon që shitjet vjetore të Tauklarify të jenë më pak se 50 milionë dollarë deri në vitin 2030.
Alzheimeri është një sëmundje progresive e trurit dhe shkaku më i zakonshëm i demencës. Ai dëmton gradualisht kujtesën, të menduarit dhe aftësinë për të kryer aktivitetet e përditshme. Sëmundja lidhet me grumbullime jonormale të proteinave beta-amiloid dhe tau në tru.
