Një trend i ri po tërheq gjithnjë e më shumë amerikanë drejt farmacive europiane: produktet e kujdesit për lëkurën.
Sipas The Wall Street Journal, turistët amerikanë nuk po i shohin më farmacitë europiane thjesht si vende ku mund të blejnë ilaçe, por si destinacione të rëndësishme për bukurinë dhe kujdesin personal. Në rrjetet sociale po shtohen videot dhe fotot e të ashtuquajturave “pharmacy hauls”, ku udhëtarët tregojnë produktet që kanë blerë gjatë vizitave në farmaci në vende të ndryshme të Europës.
Në qendër të këtij trendi janë kremrat, serumet dhe produkte të tjera të prodhuara në Bashkimin Europian, të cilat po marrin vëmendje të madhe nga konsumatorët amerikanë. Farmacitë europiane po shndërrohen kështu në një pikë pothuajse të detyrueshme të itinerarit për turistët e interesuar për kujdesin ndaj lëkurës.
WSJ e përshkruan fenomenin si pjesë të një fascinimi më të gjerë amerikan me Europën: nga ushqimi dhe mënyra e jetesës deri te produktet e bukurisë. /skyweb.al
