Visual Capitalist ka publikuar një studim në lidhje me vendet që paraqesin rrezikun më të madh për investime. Sipas të dhënave, hendeku midis ekonomive është i konsiderueshëm.
Ndërsa një numër i vogël ekonomish të qëndrueshme kanë prime rreziku rreth 4-5%, vendet që përballen me konflikt ose kolaps ekonomik mund të kalojnë edhe mbi 30%, duke treguar se sa ndjeshëm ndryshojnë perceptimet e rrezikut në tregjet globale.
Sa i përket Shqipërisë, rezulton se vendi ynë renditet ndër shtetet me nivel relativisht të ulët rreziku për investime. Konkretisht, Shqipëria ka një rrezik investimi prej 8.9%, duke u pozicionuar e dyta në rajon.
Serbia paraqitet si vendi me rrezikun më të ulët me 8.1%, ndërsa vendet me rrezik më të lartë investimi janë Mali i Zi dhe Bosnje &Hercegovina, me përkatësisht 10.1% dhe 12.6%.
Ndërkohë, sipas studimit, Europa nuk është homogjene për sa i përket nivelit të rrezikut. Vendet jugore, ekonomitë e të cilave u goditën rëndë nga kriza e borxhit e vitit 2009, kanë prime rreziku më të larta. Spanja dhe Portugalia janë në nivelin e rrezikut 5.8%, Italia në 6.7%, ndërsa Greqia arrin në 7.1%.
Si i mbështesin investitorët tregjet më të rrezikshme
Për të vlerësuar primin e rrezikut të investimit, studimi analizoi vlerësimin e kreditit të secilit vend dhe interesin shtesë që investitorët kërkojnë kur japin hua. Për vendet ku obligacionet qeveritare nuk janë të disponueshme ose nuk tregtohen në tregje financiare, vlerësimi është bazuar në ndryshimet e kthimeve të aksioneve në dy indekse të tregjeve në zhvillim.
Vendet më të rrezikshme janë zakonisht ato që përjetojnë luftëra, sanksione ose kolaps ekonomik. Bjellorusia, Libani, Sudani dhe Venezuela kanë secila prime shumë të larta rreziku për aksionet, rreth 30.9%. Nga ana tjetër, Kuba, Ukraina, Siria dhe Jemeni bëjnë pjesë në një grup vendesh me prime rreziku rreth 19.8%.
Vendet që konsiderohen më të sigurta për investime
Disa nga vendet që konsiderohen më të sigurta për investime përfshijnë Kanadanë, Gjermaninë, Zvicrënm, Singaporin, Suedinë dhe Holanda, të cilat kanë prime rreziku rreth 4.2%. Investitorët priren t’i trajtojnë këto ekonomi në mënyrë të ngjashme për shkak të stabilitetit të tyre ekonomik dhe financiar.
SHBA-ja ka një prim pak më të lartë prej 4.5%, i cili mund të pasqyrojë polarizimin e fundit politik dhe paqëndrueshmërinë më të lartë të aksioneve. /tvscan.al
