Një ilaç i lirë që përdoret prej vitesh në Britani për trajtimin e përdhesit mund të ulë ndjeshëm rrezikun e infarktit dhe goditjes në tru, sipas një studimi të ri shkencor. Ilaçi, i quajtur allopurinol, u përshkruhet tashmë mijëra pacientëve nga shërbimi shëndetësor publik britanik, NHS, dhe përdoret gjerësisht për lehtësimin e dhimbjeve të kyçeve që shkakton përdhesi, shkruan The Sun.
Rreth 1.4 milionë persona në Mbretërinë e Bashkuar vuajnë nga kjo sëmundje, e cila shkaktohet nga rritja e acidit urik në gjak dhe formimi i kristaleve që grumbullohen kryesisht në shputa, kyçe, gjunjë, duar dhe kyçet e dorës. Personat me përdhes kanë zakonisht edhe rrezik më të lartë për sëmundje të zemrës.
Allopurinoli vepron duke ulur nivelin e acidit urik në gjak, duke ndihmuar trupin të shpërbëjë kristalet dhe të lehtësojë dhimbjen. Sipas një studimi të kryer nga Universiteti i Nottinghamit, personat që e marrin këtë ilaç jo vetëm që kanë më pak kriza të përdhesit, por edhe një rrezik më të ulët për probleme serioze kardiake gjatë një periudhe pesëvjeçare.
Studimi, i publikuar në revistën JAMA Internal Medicine, analizoi të dhënat mjekësore të 110 mijë të rriturve në periudhën 2007–2021. U zbulua se pacientët që arritën të ulin nivelin e acidit urik në gjak nën 360 mikromol për litër kishin një rrezik 9 për qind më të ulët për infarkt dhe goditje në tru. Ata që e ulën këtë nivel edhe më tej, nën 300 mikromol për litër, kishin një ulje të rrezikut prej rreth 23 për qind.
Autori kryesor i studimit, profesori Abhishek Abhishek, tha se ky është studimi i parë që tregon qartë se trajtimi i përdhesit me dozën e duhur të allopurinolit mund të ndihmojë edhe në parandalimin e sëmundjeve të zemrës. Ai sqaroi se doza e duhur ndryshon nga pacienti në pacient dhe është ajo që e mban acidin urik në nivele të ulëta.
Studime të tjera kanë treguar gjithashtu se edhe ilaçe të tjera për përdhesin, si kolkicina në doza të ulëta, mund të kenë efekt mbrojtës ndaj infarktit dhe goditjes në tru. /skyweb.al
