Ndërsa udhëtarët po kërkojnë të eksplorojnë horizonte të reja në vitin 2026, ekspertët e turizmit kanë identifikuar disa destinacione që po fitojnë gjithnjë e më shumë popullaritet, shkruan Kristine Tarber për gazetën australiane “9Travel”.
Krahas vendeve tradicionale dhe shumë të kërkuara si Italia dhe Japonia, të cilat vazhdojnë të mbeten në krye të listave turistike, disa destinacione më pak të njohura deri tani janë shndërruar në pikat më tërheqëse të këtij viti.
“Shqipëria është një vend jashtëzakonisht i bukur, dhe Mali i Zi ndodhet shumë pranë saj”, u shpreh Quentin Long, ekspert i “Australian Traveller”.
“Për Shqipërinë është folur prej kohësh”, shtoi ai.
Eksperti i udhëtimeve Dilvin Yasa theksoi disa muaj më parë për “9Travel” se është befasuese sesi kjo perlë e Ballkanit vazhdon të mbetet relativisht jashtë vëmendjes së turistëve australianë.
“Sjellja mikpritëse e vendasve dhe çmimet e përballueshme janë ndër avantazhet kryesore të vendit”, tha ai.
Sipas Yasës, Shqipëria ofron gjithashtu Rivierën Shqiptare, e cila është dukshëm më ekonomike krahasuar me destinacione të ngjashme në Evropën Perëndimore, si dhe një kuzhinë të pasur dhe një trashëgimi historike të veçantë, të ndikuar nga periudha osmane dhe ajo komuniste.
“Vizitorët nuk duhet të humbasin qytetet historike të Gjirokastrës dhe Beratit, vendbanimet e lashta greke dhe romake në Parkun Arkeologjik të Apollonisë dhe Butrintit, si edhe Alpet Shqiptare, të njohura për peizazhet dramatike, fshatrat tradicionale dhe shtigjet e ecjes”, shtoi ai.
Ndërkohë, Quentin Long vuri në dukje se gjithnjë e më shumë australianë po zgjedhin të udhëtojnë në muajt jashtë sezonit të pikut – si shtatori, tetori, maji dhe qershori – për shkak të çmimeve më të ulëta, temperaturave më të buta dhe fluksit më të vogël të turistëve.
“Kjo sjell një ndryshim të ndjeshëm edhe në koston totale të udhëtimit, pasi biletat e avionit janë më të lira jashtë sezonit turistik”, shtoi ai.
Sipas “9Travel”, destinacionet kryesore për t’u vizituar në vitin 2026, bazuar në vlerësimet e ekspertëve të udhëtimit, janë:
Shqipëria
Sri Lanka
Meksika
Arabia Saudite
