SPAK sekuestron pasuritë në vlera miliona euro të Ergys Agasit dhe Ermal Beqirit, dy të dyshuarve si krerë të një grupi të strukturuar kriminal që vepronte brenda AKSHI-t dhe fitonin tendera në vlera miliona euro pranë këtij institucioni.
Në emër të Agasit janë zbuluar 29 pasuri të paluajtshme, si vila luksoze pranë Equos Resort, të legalizuara në mënyrë të paligjshme, apartamente si dhe sipërfaqe të mëdha toke. Për këto legalizime mendohet se ka qenë për të dhënë shpjegime në SPAK dhe ish drejtuesja e ASHK Dallëndyshe Bici.
Ndërkohë VNA mëson se SPAK ka ngrirë shtatë llogari bankare në emër të Agasit, si dhe nën sekuestro është vënë edhe kompania EA Solution, në ambientet e së cilës ai filmoi takimet me zyrtarë të lartë, zyrtarë policie, ndërsa shfaqet teksa paracakton dhe vlerat e tenderave me Mirlinda Karçanajn e AKSHI-t.
Ermal Beqirit i janë sekuestruar 10 pasuri të paluajtshme, përfshirë vila luksoze, llogaritë e kompanisë së tij Soft and Solution, një jaht luksoz, automjete dhe llogaritë personale.
Sekuestrimit nuk i kanë shpëtuar as dy apartamente në Tiranë dhe një duplex në një zonë rezidenciale në Qerret, të cilët dyshohen si pasuri të fshehura të ish-drejtoreshës së AKSHI-t, Mirlinda Karçanaj, për të cilën Edi Rama deklaronte se jetonte me qira.
Burimet thonë se janë ngrirë dhe fondet në llogaritë e subjekteve “FIRST” e Gëzim Hoxhës, vëllai i Ministrit të Jashtëm Ferit Hoxha; ato të “Fast tech” dhe “Fasttech and Fresh” e Andis Papas dhe “Albascan” e Elision Jorgjis.
Grupi kriminal që vepronte brenda AKSHI-t sipas SPAK urdhëronte rrëmbimin e biznesmenëve të ndryshëm dhe i detyronin nën kërcënim të hiqnin dorë nga tenderat. Ndërsa veprimtaria kriminale shtrihej në degëzime mes bizneseve të tyre dhe favorizimeve në milionat e përfituar nga tenderat e AKSHI-t. /vna.al
