Shqipëria ka vendosur nën kontroll të rreptë importin dhe eksportin e një kategorie mallrash që mund të përdoren për ekzekutime, torturë ose trajtime mizore, çnjerëzore apo poshtëruese, duke përfshirë pajisje si gijotinat dhe karriget elektrike.
Këshilli i Ministrave miratoi vendimin nr. 27, datë 21.01.2026, i botuar në Fletoren Zyrtare, për miratimin e listave të mallrave që nuk kanë përdorim tjetër përveç dënimit me vdekje, si edhe mallrave që mund të përdoren për torturë ose ndëshkime mizore dhe që do të jenë objekt i kontrollit shtetëror të transferimeve ndërkombëtare.
Në listën e mallrave që konsiderohen të dizenjuara për ekzekutimin e qenieve njerëzore përfshihen, mes të tjerash, trekëmbësha, gijotina dhe tehet për gijotinat, karrige elektrike, struktura hermetike të ndërtuara për ekzekutim me gaz apo substancë vdekjeprurëse, si edhe sisteme automatike për injektimin e substancave vdekjeprurëse.
Vendimi parashikon gjithashtu kontroll për mallra që lidhen me kufizimin e personave dhe pajisje që mund të përdoren për ndëshkim ose trajtim çnjerëzor, përfshirë pajisje elektroshoku që mbahen në trup, lloje të ndryshme prangash dhe kufizuesish, karrige kufizuese, panele dhe shtretër kufizimi, si edhe pajisje të tjera të listuara në shtojcat përkatëse.
/skyweb.al
