Rivlerësimi i pronave të paluajtshme pritet të nisë në muajin shkurt, bëri të ditur ministri i Financave, Petrit Malaj, gjatë një konference për shtyp.
Sipas tij, ligji për rivlerësimin ka hyrë në fuqi më 22 janar, ndërsa aktualisht po përgatiten udhëzimet shoqëruese që do të mundësojnë zbatimin praktik të procesit.
Ministri Malaj sqaroi se udhëzimet pritet të miratohen brenda gjysmës së parë të muajit shkurt, duke i hapur rrugë nisjes së menjëhershme të rivlerësimit të pasurive të paluajtshme.
Procesi synon të korrigjojë vlerat e pronave të regjistruara në kadastër, të cilat në shumë raste rezultojnë ndjeshëm më të ulëta se çmimet reale të tregut.
Sipas skemës së parashikuar, për rivlerësimin e pronave propozohet një tatim prej 5 për qind, nga 15 për qind që aplikohet aktualisht në rastin e shitjes së pasurisë.
Tatimi do të llogaritet mbi diferencën mes vlerës së regjistruar në kadastër dhe çmimit real me të cilin shitet prona, duke synuar të krijojë një nxitje për deklarimin më realist të vlerave të pasurive të paluajtshme.
Autoritetet presin që ky proces të ndikojë në rritjen e transparencës në tregun imobiliar dhe në përmirësimin e bazës së të dhënave mbi vlerën reale të pronave në vend. /skyweb.al
