Euro e ka nisur javën me një forcim të lehtë ndaj lekut, pas një periudhe disa javore me ecuri të dobët në tregun valutor vendas.
Sipas kursit zyrtar të këmbimit të publikuar nga Banka e Shqipërisë, një euro u këmbye sot mesatarisht me 96.67 lekë, ndërsa në mbyllje të javës së kaluar ishte 96.43 lekë, duke shënuar një rritje prej rreth 0.2 pikësh.
Kjo lëvizje përfaqëson forcimin më të ndjeshëm të euros gjatë javëve të fundit, duke e çuar monedhën europiane në nivelin më të lartë që prej mesit të dhjetorit 2025.
Në të njëjtin drejtim është lëvizur edhe paundi britanik. Ai e ka nisur javën me kursin 111.45 lekë, nga 111.21 lekë që ishte në fund të javës së kaluar, duke reflektuar një tendencë të lehtë rritëse.
Ndryshe paraqitet situata për dollarin amerikan, i cili ka vijuar rënien në tregun vendas. Sipas kursit zyrtar, dollari është këmbyer sot me 81.53 lekë, duke ruajtur presionin rënës që e ka shoqëruar gjatë ditëve të fundit.
Lëvizjet e fundit në tregun valutor vijnë pas një periudhe relativisht të qetë, ku monedhat kryesore kanë shfaqur luhatje të kufizuara ndaj lekut.
