Tetë pasagjerë, mes tyre një fëmijë dyvjeçar, u lënduan gjatë një fluturimi të Ryanair nga Berlini drejt Milanos, pasi avioni u përfshi nga turbulenca të forta që e detyruan të devijonte dhe të bënte një ulje emergjente në aeroportin Memmingen në Gjermani.
Turbulencat shkaktojnë 8 të lënduar gjatë fluturimit Berlin-Milano
Avioni, i cili duhej të ulej në aeroportin e Milanos, nuk mundi të vazhdonte fluturimin për shkak të kushteve të pafavorshme atmosferike dhe u ul në mënyrë të sigurt në Memmingen rreth orës 20:44 me orën lokale. Fluturimi nuk u lejua të vazhdonte më tej nga Autoriteti i Aviacionit të Bavarisë Jugore.
Ryanair sqaroi se kapiteni kishte kërkuar ndihmë mjekësore menjëherë pas incidentit dhe kërkoi ndjesë për shqetësimet e shkaktuara, duke organizuar transport alternativ për pasagjerët drejt Milanos dhe një fluturim zëvendësues për ditën tjetër.
Çfarë janë retë “supercell” dhe pse janë të rrezikshme për aviacionin
Pas incidentit, ekspertët kanë identifikuar si shkak të turbulencave retë e njohura si “supercell”, një formë jashtëzakonisht e fuqishme dhe e rrallë e stuhive që përfshin rrotullime të forta ajri.
Supercell është një stuhi e madhe që përmban një qendër të fuqishme rrotulluese ajri, të quajtur “mesociklon”, shkruan Skyweb.al.
Ajo krijon kushte ekstreme atmosferike si breshër i madh, erëra të forta, reshje intensive dhe, në raste të veçanta, edhe tornado.
Për avionët, rreziku kryesor që vjen nga këto stuhi është forca e jashtëzakonshme e rrymave vertikale, ku ajri ngrihet dhe zbret me shpejtësi shumë të lartë, duke krijuar turbulenca të papritura dhe të forta.
Supercell mund të shkaktojë gjithashtu ndryshime të papritura në drejtimin dhe shpejtësinë e erës, që ndikojnë ndjeshëm në qëndrueshmërinë e avionit. Në shumë raste, këto stuhi nuk janë të dukshme me sy të lirë për pasagjerët, çka e shton pasigurinë kur turbulenca ndodh papritur.
Pse ndodhin turbulencat
Turbulencat janë lëvizje të paparashikueshme të ajrit dhe mund të shkaktohen nga moti i keq, ndryshimet e temperaturës dhe presionit ose ndërveprimi i avionit me rrymat ajrore pranë maleve apo fronteve atmosferike. Edhe pse të frikshme, ato rrallë përbëjnë rrezik real për sigurinë e fluturimit. Problemet lindin kur pasagjerët nuk janë të lidhur me rrip sigurimi, çka mund të çojë në lëndime.
Për këtë arsye, pilotët dhe kompanitë ajrore i marrin paralajmërimet për turbulenca me seriozitet maksimal, duke ndjekur protokollet e sigurisë dhe duke njoftuar pasagjerët në kohë.
Udhëtimi me avion mbetet një nga mënyrat më të sigurta të transportit në botë, por fenomenet ekstreme atmosferike si supercell janë një kujtesë për rëndësinë e vigjilencës dhe përgatitjes në çdo fluturim./skyweb.al
