Tetë pasagjerë, përfshirë një fëmijë dyvjeçar, u lënduan gjatë një fluturimi të Ryanair nga Berlini drejt Milanos, i cili u detyrua të devijonte dhe të bënte një ulje emergjente në aeroportin Memmingen në jug të Gjermanisë.
Shkak për incidentin u bënë turbulencat e forta të shkaktuara nga moti i keq.
Sipas policisë bavareze, tre nga të lënduarit u transportuan në spital për trajtim, ndërsa pesë të tjerë morën ndihmë mjekësore në vendngjarje.
Si masë sigurie, të gjithë pasagjerët dhe ekuipazhi, në total 179 persona dhe gjashtë anëtarë stafi, iu nënshtruan kontrollit mjekësor.
Fluturimi, që duhej të zbriste në aeroportin e Milanos, u devijua drejt Memmingenit për shkak të kushteve të pafavorshme të motit dhe u ul në mënyrë të sigurt rreth orës 20:44 me orën lokale.
Autoriteti i Aviacionit të Bavarisë Jugore nuk autorizoi vazhdimin e fluturimit më tej.
Në një deklaratë zyrtare, Ryanair sqaroi se kapiteni kishte kërkuar ndihmë mjekësore menjëherë pas incidentit dhe kërkoi falje për shqetësimet e shkaktuara.
Kompania organizoi transport alternativ drejt Milanos për pasagjerët dhe një fluturim zëvendësues për ditën e nesërme.
Çfarë janë dhe nga se ndodhin turbulencat
Turbulencat janë lëvizje të paparashikueshme të ajrit që ndodhin gjatë fluturimit dhe shkaktohen nga ndryshime të papritura në rrjedhën e ajrit përreth avionit.
Ato mund të ndodhin për shkak të motit të keq, ndryshimeve të temperaturës dhe presionit ose ndërveprimit të avionit me rrymat ajrore që krijohen afër maleve, stuhive apo fronteve atmosferike.
Edhe pse shpesh janë të frikshme për pasagjerët, turbulencat rrallëherë përbëjnë rrezik serioz për sigurinë e avionit.
Megjithatë, ato mund të shkaktojnë lëndime te pasagjerët apo ekuipazhi, veçanërisht nëse nuk janë të lidhur me rripin e sigurimit.
Për këtë arsye, kompanitë ajrore dhe pilotët i marrin çdo paralajmërim për turbulenca me seriozitet maksimal, duke njoftuar udhëtarët dhe duke ndjekur protokollet e sigurisë. /skyweb.al
