Blerja e një apartamenti me qëllim sigurimin e të ardhurave në pleqëri ka qenë për vite me radhë një nga format më të përdorura të “pensionit alternativ” në Shqipëri. Por realiteti i tregut sot po e vë seriozisht në diskutim këtë model.
Pavarësisht se gjatë muajve të fundit vërehet një ngadalësim i rritjes së çmimeve, tregu imobiliar mbetet në nivele shumë të larta për shumicën e familjeve shqiptare.
Në Tiranë, çmimet mesatare për apartamentet në zona jo qendrore variojnë nga 1,800 deri në 2,500 euro për metër katror, ndërsa në qytete si Durrësi, Vlora apo zonat bregdetare, vlerat vijojnë të mbahen të larta për shkak të kërkesës edhe të të huajve.
Sipas agjencive imobiliare, aktualisht tregu dominohet nga tre kategori blerësish:
Kategoria e parë janë çiftet e reja që kërkojnë një banesë për jetesë dhe për ngritjen e familjes.
Kategoria e dytë janë blerësit spekulantë, të cilët synojnë të blejnë në periudha më të qeta të tregut për ta rishitur më vonë me çmim më të lartë.
Kategoria e tretë janë investitorët afatgjatë, që blejnë apartament për ta dhënë me qira dhe për ta përdorur si burim të ardhurash edhe në moshën e pensionit.
Pikërisht kjo kategori e tretë duket se po rishikon sot strategjinë e saj.
Me çmimet aktuale, kthimi i investimit nga qiraja zgjat mesatarisht mbi 15–17 vite, pa llogaritur shpenzimet shtesë si mirëmbajtja, periudhat pa qiramarrës, tatimet dhe amortizimi i pronës.
Përballë kësaj situate, një pjesë e investitorëve po orientohen drejt alternativave financiare më fleksibël, siç janë fondet e pensioneve private.
Ndryshe nga prona, investimi në pension privat nuk kërkon shuma shumë të mëdha fillestare dhe ofron kthim në periudha më të shkurtra, me alternativa të qarta dhe të parashikueshme.
Në këtë formë investimi, individi depoziton një shumë të caktuar dhe pas 10, 15 apo 20 vitesh përfiton një pagesë mujore, e cila mund të variojë nga 200 deri në 500 euro ose më shumë, në varësi të kontributit.
Avantazhi kryesor është se nuk ka probleme me qiramarrës, kontrata, taksa apo administrim prone. Investimi menaxhohet nga kompania e pensionit dhe përfituesi merr pagesën periodike të paracaktuar.
Në treg ekzistojnë kompani të konsoliduara që ofrojnë përfitime të tilla, përfshirë subjekte me asetë dhjetëra milionë euro, stabilitet financiar dhe raste konkrete përfituesish që sot marrin pensione private prej 600 deri në 700 euro në muaj siç është kompania Sigal.
Në kushtet aktuale të tregut imobiliar, gjithnjë e më shumë individë po kuptojnë se siguria financiare në pleqëri nuk lidhet domosdoshmërisht me një apartament, por me zgjedhjen e një instrumenti që ofron kthim të parashikueshëm dhe pa stres. /skyweb.al
