Vetëm pesë minuta shtesë në ditë, në momentin e duhur, mund të bëjnë një ndryshim të vërtetë. Shkenca po tregon gjithnjë e më qartë se këto minuta, kur përdoren siç duhet, mund të ndikojnë ndjeshëm në jetëgjatësinë tonë, shkruan salute.eu.
Dy studime të fundit përpiqen pikërisht të matin vlerën reale të këtyre ndryshimeve të vogla, duke u bazuar në të dhëna të regjistruara nga pajisje matëse dhe jo vetëm në deklarime teorike.
Një studim i botuar në revistën “The Lancet” analizon efektin e rritjes minimale, por të realizueshme, të aktivitetit fizik. Sipas rezultateve, shtimi i vetëm pesë minutave aktivitet fizik me intensitet të moderuar në ditë – si ecja me rreth 5 km/orë – lidhet me një ulje rreth 10% të rrezikut të vdekjes për shumicën e të rriturve që tashmë bëjnë rreth 17 minuta aktivitet të tillë në ditë. Ndërkohë, te personat më pak aktivë, që kryejnë mesatarisht vetëm dy minuta në ditë, ulja është rreth 6%.
Studimi thekson gjithashtu një aspekt që shpesh neglizhohet: rëndësinë e reduktimit të kohës së qëndrimit ulur. Ulja e kohës së ulur me 30 minuta në ditë shoqërohet me një reduktim prej 7% të vdekjeve tek ata që qëndrojnë rreth 10 orë ulur, dhe rreth 3% tek personat më sedentarë, të cilët kalojnë deri në 12 orë në ditë ulur.
Përfitimi më i madh vërehet tek individët më pak aktivë: nëse 20% e tyre do të rrisnin aktivitetin ditor me vetëm pesë minuta, ndikimi pozitiv në shëndetin e përgjithshëm do të ishte më i theksuar.
Kur koha e aktivitetit dyfishohet, efektet bëhen edhe më të dukshme. Dhjetë minuta më shumë aktivitet fizik në ditë lidhen me një ulje prej 15% të vdekjeve tek shumica e njerëzve dhe 9% tek më pak aktivët. Po ashtu, reduktimi i kohës së ulur me një orë në ditë shoqërohet me një ulje prej 13% të vdekjeve tek shumica dhe 6% tek grupet më sedentare.
Studimi tregon gjithashtu se sa më aktivë të jenë njerëzit midis moshës 50 dhe 70 vjeç, aq më i ulët është rreziku për zhvillimin e Alzheimerit dhe demencës.
Analiza bazohet në të dhëna nga mbi 135 mijë të rritur në Norvegji, Suedi dhe Shtetet e Bashkuara, të ndjekur për një periudhë mesatare prej tetë vitesh.
Sipas autorëve, për personat me zakone të dobëta gjumi, aktiviteti fizik dhe ushqyerje jo të shëndetshme, edhe disa ndryshime të vogla të koordinuara mund të sjellin përfitime të mëdha. Vetëm pesë minuta më shumë gjumë, dy minuta më shumë aktivitet fizik me intensitet mesatar dhe gjysmë porcioni më shumë perime në ditë, teorikisht mund të shtojnë rreth një vit jetë për ata që nisin nga kushtet më të pafavorshme.
Ndërkohë, një stil jetese që përfshin 7–8 orë gjumë, mbi 40 minuta aktivitet fizik në ditë dhe një dietë të shëndetshme, shoqërohet me më shumë se nëntë vite jetë shtesë.
