Shpenzimet për ushqime zënë një pjesë të konsiderueshme të buxhetit familjar në Europë, por çmimet e produkteve ushqimore ndryshojnë ndjeshëm nga një vend në tjetrin. Të dhënat e mesit të vitit 2026 nga Numbeo tregojnë se Shqipëria renditet ndër vendet me ushqimet më të shtrenjta në rajon, duke lënë pas disa vende anëtare të Bashkimit Europian.
Sipas indeksit të çmimeve të ushqimeve, Shqipëria regjistron një vlerë prej 80.5 pikësh, kundrejt mesatares së Bashkimit Europian, e cila është vendosur në 100 pikë. Megjithatë, në krahasim me vendet e Ballkanit Perëndimor, Shqipëria paraqitet më e shtrenjtë se Serbia, me 68.8 pikë, Bosnja dhe Hercegovina, me 67.9 pikë, Mali i Zi, me 70.3 pikë, si dhe Maqedonia e Veriut, me 59.8 pikë. Kosova regjistron një indeks prej 60.6 pikësh.
Shqipëria rezulton gjithashtu më e shtrenjtë se disa vende të Bashkimit Europian, përfshirë Bullgarinë, me 76 pikë, Poloninë, me 70.8 pikë, Rumaninë, me 66.7 pikë, si dhe Hungarinë dhe Kroacinë, të cilat regjistrojnë nga 85.9 pikë. Këto të fundit, megjithatë, kanë një indeks më të lartë se Shqipëria.
Në Europë, çmimet më të larta të ushqimeve regjistrohen në Zvicër, me 189.2 pikë, e ndjekur nga Islanda me 183.6 pikë dhe Norvegjia me 154.4 pikë. Mes vendeve të Bashkimit Europian, Luksemburgu dhe Danimarka janë ndër më të shtrenjtat, me përkatësisht 134.9 dhe 128.4 pikë. Në anën tjetër, Moldavia shënon indeksin më të ulët në Europë, me 57.2 pikë. /skyweb.al
