Kryeministri Edi Rama ka reaguar sërish ndaj vendimit të GJKKO-së për pezullimin e ministres Belinda Balluku, e cila është marrë e pandehur nga SPAK dhe po hetohet për skandalet me vlerë miliona euro në Tunelin e Llogarasë dhe Unazën e Madhe të Tiranës. Rama e cilëson vendimin “absurd” dhe thekson se pezullimi i një ministri cënon funksionimin normal të qeverisë dhe interesin publik.
Sipas tij, një nga pasojat më të drejtpërdrejta është pezullimi i procesit për nisjen e fluturimeve transoqeanike Shqipëri–Kanada, një projekt që qeveria e konsideron të mbyllur në nivel teknik. Rama thotë se pala kanadeze ka dhënë përgjigje pozitive dhe marrëveshja është gati, por nuk mund të vijojë me miratimin dhe nënshkrimin, pasi kompetencat janë ekskluzive të ministrit dhe nuk delegohen dot.
Sipas kryeministrit, kjo vonesë mund të vendosë në pikëpyetje nisjen e fluturimeve në qershor 2026, ashtu siç ishte planifikuar fillimisht.
Rama deklaron se pezullimi ka bllokuar aktualisht edhe 36 akte të tjera të Ministrisë së Infrastrukturës dhe Energjisë, përfshirë 18 akte që lidhen me procesin e rindërtimit. Sipas tij, çdo ditë që kalon, lista e punëve të bllokuara po zgjerohet.
Reagimi vjen në një kohë kur debati mbi kompetencat, balancën e pushteteve dhe rolin e SPAK në raport me qeverinë është intensifikuar, pas vendimit historik të pezullimit të një ministri në detyrë.
