Ministri i Pushtetit Vendor, Arbjan Mazniku, ka njoftuar përmes një postimi në rrjetet sociale vendimin e Këshillit të Ministrave për krijimin e Akademisë së Pushtetit Vendor, një nismë e re që synon trajnimin e vazhdueshëm dhe zhvillimin profesional të administratës lokale në të gjitha bashkitë e Shqipërisë.
Sipas Maznikut, kjo është hera e parë që bashkitë do të kenë mundësinë të themelojnë një institucion të përbashkët, i cili do të fokusohet në përmirësimin e aftësive dhe shërbimeve të ofruara nga strukturat vendore.
Në tre vitet e para të funksionimit, qeveria qendrore do të mbulojë 50% të kostos së funksionimit të Akademisë, ndërsa pjesa tjetër do të përballohet nga bashkitë anëtare.
Objektivi është rritja e kapaciteteve profesionale të administratës lokale dhe sigurimi i standardeve europiane në ofrimin e shërbimeve për qytetarët.
Nisma konsiderohet një hap drejt forcimit të decentralizimit dhe modernizimit të pushtetit vendor në kuadër të objektivave të zhvillimit të qëndrueshëm dhe integrimit europian të Shqipërisë. /skyweb.al
