Tregtia midis Bashkimit Europian dhe Shteteve të Bashkuara mbetet e fuqishme, por gjithashtu e ndikuar nga pasiguria, sidomos për shkak të politikave të reja tarifore të administratës së Donald Trump.
BE-ja është partneri më i madh tregtar i SHBA-së, dhe së bashku përbëjnë mbi 40% të prodhimit ekonomik global dhe rreth një të tretën e tregtisë botërore. Në vitin 2024, shkëmbimet e mallrave midis tyre tejkaluan 975 miliardë dollarë, ndërsa përfshirja e shërbimeve çoi vëllimin total në rreth 1.68 trilionë euro. Megjithatë, SHBA-ja ka një deficit të konsiderueshëm tregtar me BE-në në mallra, i cili arriti në 197 miliardë euro në të njëjtin vit.
BE-ja regjistron suficite të mëdha në sektorë si automjetet dhe farmaceutika, ndërsa SHBA-ja ka suficit kryesisht në energji (naftë, gaz dhe qymyr). Pjesërisht, kjo situatë balancohet nga tregtia e shërbimeve, ku SHBA-ja, falë kompanive të mëdha teknologjike dhe shërbimeve digjitale, ka një suficit prej rreth 148 miliardë eurosh. Sipas të dhënave të DW, kur merren parasysh mallrat dhe shërbimet së bashku, deficiti i SHBA-së zvogëlohet në rreth 50 miliardë euro, duke treguar se marrëdhënia tregtare është më e ekuilibruar se sa shpesh paraqitet.
Europa është gjithashtu një treg kyç për eksportet amerikane të energjisë, veçanërisht për gazin natyror të lëngshëm (LNG). Pas luftës në Ukrainë, BE-ja u bë blerësi kryesor i LNG-së amerikane, duke krijuar një varësi të ndërsjellë: ndërprerjet mund të dëmtonin si Europën, ashtu edhe prodhuesit amerikanë. Në sektorin bujqësor, SHBA-ja mbështetet te tregu evropian për produkte si soja. Çdo kundërtarifë e mundshme nga BE-ja mund të ndikonte negativisht tek fermerët amerikanë, ndërsa Europa mund të gjejë alternativa nga vende si Brazili. Po ashtu, SHBA-ja varet nga kreditorët europianë për financimin e borxhit të saj të lartë publik, pasi ata mbajnë pothuajse gjysmën e borxhit amerikan të jashtëm.
Politikat tarifore kanë ndikuar edhe në dobësimin e dollarit. Një dollar më i dobët favorizon eksportet amerikane, por rrit kostot e importeve dhe, rrjedhimisht, inflacionin. Në përgjithësi, marrëdhëniet tregtare BE–SHBA janë thellësisht të ndërvarura, duke sjellë përfitime dhe rreziqe të ndërsjella, dhe çdo konflikt tarifor kthehet në një sfidë komplekse me pasoja për të dyja palët.
