Është ndarë nga jeta në orët e para të mëngjesit mësuesi, gazetari dhe intelektuali Namir Lapardhaja, si pasojë e një tromboze në sistemin e qarkullimit të gjakut.
Lapardhaja njihej si një qytetar i angazhuar, që e ndërtoi jetën e tij mes mësuesisë, gazetarisë dhe aktivizmit qytetar, duke qenë një zë i pranishëm në jetën publike të Beratit dhe mbarë vendit.
Ai spikati për formimin e tij kulturor dhe mendjen e hapur, duke u shquar si një analist kritik, veçanërisht ndaj zhvillimeve brenda së djathtës shqiptare dhe sfidave që përballet opozita.
Namir Lapardhaja është autor i librave, eseve dhe një numri të madh artikujsh, të cilat përbëjnë një trashëgimi të vyer kulturore për shoqërinë dhe për familjen e tij.
Redaksia e Skyweb.al i shpreh ngushëllime familjes për humbjen e tyre të madhe. Namiri ishte një mësues i mirë, djalë flori që kontribuoi në edukimin jo vetëm të brezave në qytetin e tij të lindjes, por edhe të shoqërisë shqiptare me thellësinë e mendimit, urtësinë, qytetarinë dhe intelektin që e karakterizonte. /skyweb.al
