Italia ka zënë vendin e parë për numrin e turistëve të huaj që kanë qëndruar në strukturat akomoduese në Shqipëri gjatë muajit maj 2025, duke lënë pas qytetarët nga Kosova, të cilët tradicionalisht kanë mbajtur kryesimin prej vitesh.
Ky ndryshim pasqyron një zhvendosje të dukshme në profilin e turistëve që zgjedhin Shqipërinë si destinacion.
Sipas të dhënave të publikuara nga INSTAT, numri i vizitorëve jorezidentë në Shqipëri gjatë muajit maj është rritur me 27.3%, ndërsa netqëndrimet janë rritur me 32.1% krahasuar me majin e kaluar.
Vizitorët më të shumtë kanë ardhur nga Italia, e ndjekur nga Kosova dhe Gjermania.
Rritja e ndjeshme e turistëve italianë lidhet me promovimin e Shqipërisë si destinacion i sigurt dhe i aksesueshëm, me çmime konkurruese dhe natyrë tërheqëse.
Ndikim ka pasur edhe shtimi i fluturimeve direkte dhe interesimi i mediave italiane për rivierën shqiptare.
Nga ana tjetër, vizitorët nga Kosova mbeten një segment shumë i rëndësishëm i turizmit shqiptar, por hyrja në fuqi e regjimit pa viza me Bashkimin Europian ka rritur mundësitë e qytetarëve të Kosovës për të udhëtuar drejt vendeve të tjera europiane, duke ndikuar në një rënie të lehtë të numrit të tyre në strukturat akomoduese në Shqipëri për muajin maj.
Megjithatë, Shqipëria mbetet një destinacion i rëndësishëm për pushuesit kosovarë, veçanërisht gjatë sezonit të verës, ndërsa shifrat e majit sinjalizojnë një zgjerim dhe diversifikim të tregjeve turistike, me Italinë që po fiton gjithnjë e më shumë terren. /skyweb.al
