Parlamenti i Greqisë ka miratuar të premten një projektligj që ndalon përdorimin e platformave të rrjeteve sociale nga fëmijët nën moshën 15 vjeç. Vendimi vjen në një kohë kur po rriten shqetësimet për ndikimin e këtyre platformave në shëndetin dhe sigurinë e të miturve.
Sipas masave të miratuara, ndalimi do të hyjë në fuqi më 1 janar 2027. Kryeministri grek, Kyriakos Mitsotakis, bëri të ditur se platformat do të kenë një afat për të zhvilluar mekanizma që mundësojnë verifikimin e moshës së përdoruesve, duke garantuar njëkohësisht mbrojtjen e privatësisë së tyre.
Greqia është pjesë e një grupi prej shtatë shtetesh anëtare të Bashkimit Evropian që po bashkëpunojnë me Komisionin Evropian për gjetjen e një zgjidhjeje të përbashkët për verifikimin e moshës në platformat digjitale.
Nisma synon të forcojë mbrojtjen e fëmijëve në internet dhe të kufizojë rreziqet që lidhen me përdorimin e rrjeteve sociale në moshë të hershme. /skyweb.al
