Qeveria ia dorëzon Maznikut kontrollin mbi emërimet në njësitë administrative, krijohet organizatë e re për bashkëqeverisje me bashkitë
Qeveria ka miratuar një vendim të rëndësishëm që i jep ministrit të Pushtetit Vendor, Arbjan Mazniku, autoritetin për të negociuar dhe nënshkruar me bashkitë marrëveshjen për emërimin e drejtuesve të rinj të njësive administrative në vend. Ky zhvillim vjen pas dorëheqjes masive të drejtuesve aktualë, të cilët reaguan ndaj një ultimatumi të dhënë nga Kryeministri Edi Rama.
Në vendim parashikohet ngritja e një organizate jofitimprurëse mes Ministrisë së Pushtetit Vendor dhe bashkive, ku Mazniku do të ketë rolin drejtues.
Kjo organizatë do të ketë për mision zhvillimin dhe kualifikimin profesional të zgjedhurve vendorë, nëpunësve civilë dhe punonjësve të tjerë në administratën vendore, me synim përmirësimin e performancës dhe mbështetjen e komuniteteve, përfshirë përgatitjen për sfidat e integrimit në Bashkimin Evropian.
Bazuar në pikën 5 të nenit 14 të ligjit për vetëqeverisjen vendore, vendimii lejon krijimin e një personi juridik të ndarë, të autorizuar me kompetenca të deleguara nga bashkitë dhe qeveria qendrore.
Si rezultat, kryebashkiakët do të transferojnë autoritetin e tyre për emërime dhe shkarkime në njësitë administrative te kjo strukturë e re, në krye të së cilës do të jetë vetë ministri Mazniku.
Ky vendim pritet të ndryshojë ndjeshëm mënyrën e funksionimit të administratës vendore në Shqipëri, duke qendruar nën kontrollin e qeverisë përmes një mekanizmi të centralizuar./skyweb.al
