Kryeministri Edi Rama reagoi ndaj propozimeve të disa shoqatave lidhur me rritjen e çmimeve të karburanteve dhe kërkesës që qytetarët dhe bizneset të kompensohen nga buxheti i shtetit.
Në një deklaratë para furnizuesve të karburanteve, ai theksoi se asnjë kategori tjetër, përveç pensionistëve, nuk do të përfitojë mbështetje financiare nga buxheti. Sipas tij, të ardhurat shtesë që vijnë nga TVSH-ja mbi çmimet e rritura të karburanteve nuk do të shpërndahen për të gjithë, por vetëm për këtë shtresë.
“Një kërkesë që më ka tërhequr vëmendje është që e gjithë shtesa e të ardhurave në buxhet nga TVSH-ja mbi çmimin e rritur të karburantit, të rikthehet për qytetarët dhe bizneset, në çmimin fundor. Ka vetëm një kategori që do të marrë më shumë sa herë që të jepet mundësia, qoftë nga rritja ekonomike mbi parashikimin, qoftë dhe nga të ardhura të rritura si pasojë e situatave kësaj natyre dhe kjo kategori është ajo e pensionistëve. . Ajo është kategoria e pensionistëve dhe askush tjetër. Pikë! Askush nuk duhet të kërkojë nga buxheti i shtetit më shumë se sa si takon. Pagat janë rritur dhe vazhdojnë të rriten sipas parashikimeve të bëra. Siç e dini më mirë se shumëkush tjetër, në sektorin privat pagat janë rritur dhe rriten në mënyrë të vazhdueshme, sidomos për ata që kanë kualifikime. Nuk është më pyetja; a vjen të punosh me këtë pagë, por është ndryshe; sa e do pagën që të vish të punosh. Përgjigja jonë për çdo kërkesë dhe orvatje e fantazi se çfarë vjen si rritje në buxhetin e shtetit, edhe për sa i përket komponentit të TVSH në çmimin e rritur të karburantit, është po, patjetër. Por është vetëm për një kategori, për pensionistët.”, ta ai. /skyweb.al
