Sipas raportit të publikuar nga VNA, 52% e ankesave të shqyrtuara janë pranuar si të drejta, një tregues i fortë për problematika serioze në mënyrën si zhvillohen tenderat. Në total, gjatë një viti janë depozituar mbi 1,100 ankesa, ndërsa 37% e tyre lidhen që në fazën fillestare me dokumentet e tenderit, duke ngritur dyshime për kritere të hartuara në funksion të operatorëve të paracaktuar.
Lista e institucioneve me numrin më të lartë të ankesave përfshin Operatorin e Blerjeve të Përqendruara, Agjencinë Kombëtare të Shoqërisë së Informacionit, Qendrën Spitalore Universitare “Nënë Tereza”, shoqërinë Albpetrol, si dhe një sërë bashkish dhe ndërmarrjesh publike, ndër to Bashkia Kamëz, Bashkia Durrës, Posta Shqiptare, Bashkia Tiranë, Ujësjellës Kanalizime Tiranë dhe Spitali Rajonal Durrës.
Raporti evidenton gjithashtu problematika të theksuara në Operatorin e Shërbimeve të Kujdesit Shëndetësor, në sektorin energjetik ku përfshihen Korporata Elektroenergjitike Shqiptare dhe OSHEE, si dhe në infrastrukturë, ku Autoriteti Rrugor Shqiptar shoqërohet me vlera të larta ankesash.
Një nga elementët më shqetësues është moszbatimi i vendimeve të Komisionit të Prokurimit Publik. Sipas raportit, janë dashur dhjetëra kërkesa zyrtare për të detyruar institucionet të zbatojnë vendimet, duke treguar një rezistencë të hapur ndaj ligjit.
Pavarësisht volumit të lartë të shkeljeve të konstatuara, gjatë vitit 2025 vetëm 3 raste janë referuar në Prokurori, një shifër që bie në kontrast të fortë me numrin e ankesave dhe problematikave të evidentuara.
Raporti konfirmon se tenderat publikë vijojnë të mbeten një nga hallkat më të dobëta të administrimit financiar në vend, ku transparenca dhe konkurrenca shpesh zëvendësohen nga praktika që favorizojnë një numër të kufizuar operatorësh. /skyweb.al
