Qeveria shqiptare planifikon ndërtimin e një aeroporti sezonal në jug të vendit, pas hapjes së aeroportit të Vlorës, ndërsa synon të bëjë funksional edhe aeroportin e Kukësit.
Plani u bë publik nga kryeministri Edi Rama gjatë Samitit të Euronews për Turizmin, të zhvilluar në Bruksel.
Rama nuk dha detaje për vendndodhjen, kostot apo afatet e aeroportit të ri sezonal, por e paraqiti projektin si pjesë të zgjerimit të infrastrukturës ajrore për përballimin e rritjes së turizmit.
“Kemi një aeroport me rritjen më të shpejtë në Europë. I kemi lënë fqinjët pas për të pestin ose të gjashtin vit. Kemi lënë pas edhe aeroportin e Beogradit”, deklaroi kryeministri, duke iu referuar Aeroportit Ndërkombëtar të Tiranës.
Sipas tij, pas aeroportit të Vlorës po punohet për një tjetër aeroport në jug, i cili do të përdoret kryesisht gjatë sezonit turistik.
Rama foli gjithashtu për aeroportin e Kukësit, të cilin e përshkroi si aeroportin e katërt të vendit, por që aktualisht nuk po funksionon në nivelin e synuar nga qeveria.
“Tani do të hapim një aeroport të ri në Vlorë dhe po punojmë për një aeroport tjetër sezonal në jug. Është edhe një i katërt në zonën malore, por nuk po punon ashtu siç do të donim”, tha ai.
Kryeministri e lidhi zgjerimin e infrastrukturës aeroportuale me objektivin për të tërhequr turistë nga tregje gjithnjë e më të largëta.
Sipas tij, Shqipëria numëronte rreth 2 milionë hyrje turistike në fillim të procesit të transformimit të sektorit, ndërsa vitin e kaluar u regjistruan 12 milionë vizitorë të huaj.
Rama përmendi rritjen e turistëve nga Japonia, Shtetet e Bashkuara, Amerika Latine, Kina, Izraeli dhe vendet e Lindjes së Mesme.
“Objektivi ynë është bota, sepse po zbulojmë se të gjitha pjesët e saj po marrin pjesë në këtë rritje”, deklaroi kryeministri.
Samiti në Bruksel mblodhi politikëbërës, investitorë, drejtues të industrisë dhe ekspertë për të diskutuar zhvillimet e turizmit, inovacionin digjital, ndryshimin e kërkesave të udhëtarëve dhe zhvillimin e qëndrueshëm të sektorit.
