Shqipëria do të marrë pjesë nga 3–5 marsi në Panairin Ndërkombëtar të Turizmit, ITB Berlin 2026, duke u prezantuar si një destinacion autentik mesdhetar me identitet të qartë dhe ofertë të larmishme turistike.
Ministri i Turizmit, Kulturës dhe Sportit, Blendi Gonxhja, bën të ditur se edicioni i këtij viti, që përkon me 60-vjetorin e panairit, përbën një mundësi të rëndësishme për të promovuar potencialin e Shqipërisë në tregun ndërkombëtar. Ai theksoi se vendi ynë do të përfaqësohet me një axhendë të pasur aktivitetesh dhe me një stendë të konceptuar nga Ministria e Turizmit, Kulturës dhe Sportit në bashkëpunim me Agjencinë Kombëtare të Turizmit.
Në panair do të prezantohet një eksperiencë e integruar që ndërthur inovacionin me kulturën, bukuritë natyrore dhe përvojat autentike lokale. Pjesë e delegacionit do të jenë disa bashki, rreth 30 turoperatorë si dhe biznese shqiptare të sektorit të turizmit.
Megjithëse me një territor të vogël, Shqipëria ofron një shumëllojshmëri të jashtëzakonshme peizazhesh dhe përvojash. Alpet Shqiptare përfaqësojnë një destinacion ideal për turizmin malor dhe aventurë, ndërsa Riviera Shqiptare spikat për turizmin bregdetar me kapacitete të menaxhuara. Qytetet historike ofrojnë turizëm kulturor, ndërsa fshatrat promovojnë turizmin rural dhe gastronomik, duke e pozicionuar vendin si një alternativë të qëndrueshme ndaj turizmit masiv.
Fokusi i ITB Berlin 2026 mbi turizmin e qëndrueshëm, përvojat autentike dhe modelet e zhvillimit të balancuar krijon një mundësi konkrete për Shqipërinë që të promovojë një profil të diferencuar dhe afatgjatë në tregun global. /skyweb.al
