Pas më shumë se dy dekadash investimesh në mësimin digjital, Suedia po ndryshon kurs në arsim duke rikthyer librat, letrën dhe shkrimin me dorë në qendër të procesit mësimor.
Vendi skandinav, i konsideruar prej vitesh si një nga modelet e digjitalizimit të shkollave në Evropë, po kufizon përdorimin e tabletëve dhe kompjuterëve, sidomos te fëmijët e vegjël. Qeveria suedeze ka financuar blerjen e teksteve të reja shkollore me 685 milionë korona suedeze dhe ka planifikuar fonde shtesë prej 500 milionë koronash në vit për materialet e printuara.
Ministria e Arsimit ka bërë të qartë gjithashtu se fëmijët deri në moshën 6-vjeçare duhet të përdorin shumë pak ose aspak pajisje digjitale gjatë ditës në shkollë.
Ndryshimi vjen pas shqetësimeve për rezultatet e nxënësve në lexim dhe për rënien e aftësisë së tyre për t’u përqendruar gjatë teksteve të gjata. Në testin ndërkombëtar PIRLS, Suedia ra nga 555 pikë në vitin 2016 në 544 pikë në vitin 2021, megjithëse vijon të mbetet mbi mesataren ndërkombëtare.
Mësuesit suedezë kanë raportuar gjithashtu se një numër në rritje nxënësish kanë vështirësi të lexojnë gjatë pa ndërprerje dhe humbasin më shpejt përqendrimin kur mësimi zhvillohet vetëm përmes ekranit.
Edhe UNESCO ka paralajmëruar se teknologjia në arsim duhet të përdoret si mbështetje për mësimdhënien dhe jo si qëllim në vetvete.
Studiuesit argumentojnë se shkrimi me dorë aktivizon njëkohësisht zona të trurit që lidhen me shikimin, koordinimin motorik, gjuhën dhe kujtesën.
Në të kundërt, të shkruarit në tastierë përfshin lëvizje më të kufizuara dhe më pak stimuj shqisorë, veçanërisht në moshat e vogla.
Studime të ndryshme kanë treguar gjithashtu se kuptimi i tekstit shpesh është më i mirë kur materiali lexohet në letër dhe jo në ekran. Suedia megjithatë nuk po heq dorë nga teknologjia.
Kompjuterët dhe tabletët do të vazhdojnë të përdoren për kërkim, bashkëpunim mes nxënësve dhe zhvillimin e aftësive digjitale.
Ndryshimi qëndron te roli i tyre: teknologjia shihet tashmë si plotësuese e mësimit dhe jo si zëvendësuese e librit.
Politika e re vjen në një kohë kur fëmijët dhe adoleshentët kalojnë gjithnjë e më shumë kohë përpara ekraneve edhe jashtë shkollës.
Rasti i Suedisë po ndiqet me interes edhe nga vende të tjera evropiane, pikërisht sepse vjen nga një prej shteteve që kishte përqafuar më herët dhe më fort digjitalizimin e arsimit.
Debati tashmë nuk është më nëse teknologjia duhet të përdoret në shkollë, por sa dhe në çfarë moshe duhet të përdoret pa dëmtuar përqendrimin, leximin dhe të nxënit.
