Këshilli i Sigurisë Kombëtare i Greqisë ka miratuar një nga paketat më të mëdha të armatimit të viteve të fundit, me një vlerë që arrin në rreth 4.2 miliardë euro.
Në qendër të programit qëndron projekti “Mburoja e Akilit”, i cili synon të krijojë një sistem të unifikuar për mbrojtjen kundërajrore dhe antibalistike të territorit grek.
Arkitektura e re do të bashkojë në një sistem të vetëm komandimi dhe kontrolli të dhënat që vijnë nga radarët, sensorët dhe njësitë e Forcave të Armatosura, duke bërë të mundur identifikimin dhe prioritizimin më të shpejtë të kërcënimeve.
Sipas ministrit grek të Mbrojtjes, Nikos Dendias, sistemi synon të përpunojë informacionin operacional në kohë reale dhe të propozojë përgjigjen e përshtatshme ndaj çdo kërcënimi.
Programi përfshin edhe blerjen e tre sistemeve izraelite të mbrojtjes ajrore, të cilat do të formojnë bërthamën e “ombrellës” së re mbrojtëse.
Kostoja vetëm për këtë pjesë të programit pritet të kalojë 3 miliardë euro.
Një nga kushtet kryesore të vendosura nga Athina gjatë negociatave me Izraelin ka qenë sigurimi i aksesit në kodin burimor të sistemeve.
Sipas qeverisë greke, kjo do t’u japë Forcave të Armatosura kontroll të plotë operacional dhe do të shmangë varësinë nga furnizuesit e huaj.
Një tjetër element i rëndësishëm është përfshirja e industrisë greke të mbrojtjes në të paktën 25% të zbatimit të programeve.
Vlera e punëve që mund t’u kalojnë kompanive greke llogaritet në rreth 750 milionë euro, duke synuar edhe transferimin e teknologjisë dhe njohurive.
Paketa konsiderohet si faza e parë e zbatimit të “Agjendës 2030” për modernizimin e mbrojtjes greke.
Sistemi i ri është projektuar për të përballuar një gamë të gjerë kërcënimesh, nga raketat balistike dhe sulmet ajrore deri te dronët dhe sistemet e tjera pa pilot.
Sipas planit, dërgesat do të bëhen në mënyrë graduale, ndërsa vendosja e plotë e sistemit pritet të përfundojë brenda rreth 35 muajve.
Athina synon që përmes këtij investimi të krijojë disa shtresa të njëpasnjëshme mbrojtjeje për ishujt dhe territorin kontinental.
Marrëveshja forcon gjithashtu bashkëpunimin ushtarak mes Greqisë dhe Izraelit, në një periudhë kur siguria në Lindjen e Mesme dhe Mesdheun Lindor mbetet në qendër të zhvillimeve gjeopolitike.
